pnd西餐的八卦，Yahoo名人娛樂都在討論

深水埗食玩地圖：

中午出發：

鴨寮街（平價攝影器材入貨）→合益泰小食（潘記出品勁滑腸粉）→西九龍中心→Candy Pills買糖→皇帝雞→浪漫滿屋Full House→白紙工作室（飲野，手作）貓cafe→美荷樓（呼吸冰室/參觀）→17:30嘉頓山影日落、夜景

下午：

Burgerman下午茶→黃金/福仁（平價攝影器材入貨）→「飯意主題餐廳」→綠林甜品（豆腐布甸）→新香園堅記（蛋牛治宵夜）

蛋包飯、芝士熔岩蛋漿飯，深水埗隱世出品，價位唔貴，竟然有驚喜！

呢間以飯同意粉做主題嘅餐廳，重口味嘅潮友肯定啱食！除咗蛋包飯，呢度仲有鐵板飯、意粉、小食拼盤（抵食$42一盤2-3人份量）、珍珠奶茶、薄荷朱古力（好好飲）等。

第一正就係《香煎漢堡蛋包飯》$42漢堡扒以牛肉豬肉自家製，有肉汁，咸咸香香，送飯一流～漢堡扒肉味頗濃，而且煎得焦香！飯底係茄汁炒飯底，食落飯粒分明～流心玉子好嫩滑，入口仲有奶香！
醬汁方面，咖哩、白汁、濃鮮茄汁同胡麻醬汁全部齊哂～推介！

正正子嘅《新派芝士熔岩蛋漿飯》$48由韓式辣醬，泡菜，午餐肉，香葱，芝士砌成，先將蛋漿倒入煮好嘅泡菜炒飯裡面，然後等啲蛋汁流入鐵板，再加入大量芝士，之後撈撈撈～平平地，就可以拉芝士，cp值真係幾高！

飯意主題餐廳
電話：23611611
人均消費：$35-$50
座位：60
星期一至日 11:00-23:00
#PND深水埗 #PND西餐 #PND港式 #PND韓國菜 #PND芝士
@深水埗元州街146號華興大樓地舖

點樣先叫隱世？就係明明喺正旺如尖沙咀同佐敦哩啲地區，又偏偏開喺小巷，仲要上樓梯同行到最篤篤先搵到，PND都要搵左一輪先安全成功到埗。

溫書溫得咁辛苦，吊頸都透下氣呀。

歎個大大份下午茶，對自己好啲先！PND覺得佢地嘅《Life Take a Break Tea Set》 $288/2人，幾抵食，食物都有成11款，仲包兩杯飲品。

千層蟹餅最惹味，頂層嘅手拆蟹肉拌秘製醬，加埋中間嘅蛋沙律、底層嘅脆脆餅底，係重口味潮友嘅首選！幾款自家甜品都幾有功架，Tiramisu夠軟滑，芝士蛋糕細滑而重芝士香，仲有唔同嘅撻類添。Tea Set逢星期六日同公眾假期先有，如果平日都想食嘅潮友，記得早兩日打電話book定呀喇

白汁辣意粉，意外地夾調。《辣汁洋蔥海鮮意大利粉》$98，紅汁辣味意粉平時就食得多，呢度嘅意粉夠彈牙，海鮮份量多，配埋辣度啱啱好嘅洋蔥白汁都幾夾，唔錯！口痕潮友必食《水牛城雞翼》$48，一碟6件人人有份。醬汁味道夠濃郁但唔會過咸，叫黎做小食開胃最啱。

平時最唔鍾意食薄荷味野嘅PND，唯獨鍾情呢到杯《薄荷朱古力》$48。「如果太多薄荷味，朱古力味無定企」，報告：呢到無咁樣嘅情況發生。

特別一提：呢到只有午市同tea time係做西餐咋，晚市係泰國菜，大廚仲係正宗「泰」人，聽講好似都幾好味。

LIFE
地址：尖沙咀柯士甸道118-120號業廣商業大廈一樓2-3號舖（見到金田長招牌上樓梯行到最篤）
電話：2375 2800
營業時間：星期一至日 12:00-02:00
@Liferestaurantandbar
#PND又到聖誕2015 #PND尖沙咀 #PND西式

超好食。食哂上圖啲野，潮友就會明。

PND食過呢個舖位嘅上一手(Cxxx Sxxxx)，同樣係西餐，今次心痕再嚟食，竟然發現轉咗手仲好味咗，個湯仲要好味到PND要又食又拎。

小店兩面舖加埋有40個位，裝修同以前差唔多無咩改動，夜晚同樣可以食燭光晚餐加甜品，同潮友/男女朋友慶生，想喺甜品碟寫字，早一日打電話預訂就得架喇！正！

Dinner time～成版主菜都有二十款揀，+$35可配餐飲&餐湯/沙律！

是日餐湯之中有款世界級好味嘅必飲推介：《蕃茄濃湯》! 以為飲落有薯仔蓉，挑機問完先知，呢度堅係用成籃蕃茄打成蓉嚟燉湯，加埋忌廉令個湯再滑身少少，唔會太酸，但好濃厚，真係飲上癮囉救命！

main之中，burger、扒類好似羊架、和牛面脥、意粉、意大利飯等都係主打，PND最愛嘅羊，再唔係薄身蒙古羊，而係《香草香煎鈕西蘭羊架$188》仲可選焗薯/薯條/薯蓉添，配黑椒/蘑菇/燒汁3選1。4骨羊鞍非常厚身，目測有2.6cm，好有份量！七成熟，切開仍然係粉嫩嘅顏色，無咩騷味，但肉夠嫩，而且口感一流。

仲有紫色嘅《北海道帶子紫薯意大利飯$148》，兩件巨型半熟帶子刺身非常吸引，切開入口，即食，好似食緊鮮甜嘅火炙刺身咁，真係食到PND心心眼。雖然飯嘅紫薯味唔係太出，應該係被湯汁啱啱蓋過，不過加埋啲菇都幾好味！

叫埋最後嘅《卡邦尼藍芝士意大利粉$98》，意粉煮嘅時間控制得好好，幼身嘅意粉仍然Al dente，藍芝士醬汁唔會過份濃味，加埋白汁掛喺每一條意粉上，非常惹味。

加多$20，可食埋甜品，梗係食埋啦。叫咗《伯爵茶creme brulee》同Tiramisu，後者有2隻唔同嘅酒香，再嚟係淡淡嘅咖啡香；前者就非常嫩滑，茶味係慢慢滲出，唔會只食到茶味，而仲有蛋香。

其實之前都食過佢地嘅brunch，Egg Benedict嘅荷蘭汁酸酸地，個人非常鐘意，加埋流心蛋食係完美。而《啤酒脆漿炸魚薯條$78》都好有驚喜。

如果佢開喺我屋企樓下，我應該會成日幫襯。

JC Room
電話：23855168
星期二至五 18:00-22:30
星期六至日，公假 11:00-16:00；18:00-22:30
星期一休息，如公眾假期順延一日
#PND元朗 #PND西式 #PND小食 #PND甜品
@元朗鳯攸南街3號好順景大廈地下44號鋪