前度極力推銷嘅精神領袖課程，我當然唔陌生，因為喺報館嘅舊同事馬仔已經中咗招，佢本來月薪3萬，結咗婚，小朋友亦好細個，突然辭咗份咁穩定嘅工作，實在令人費解，但係佢fb嘅post好快就為大家揭開謎底。
馬仔呢幾年嘅fb不外乎post啲自high嘢，例如#感恩，講下自己點樣戰勝心魔，又點樣無懼挑戰，總之成個人好似千年風濕好返晒，差少少就要統治地球咁滯，然後下面好多人留言「支持你！」、「有幸見證你分享願景」、「打造最美好世界 Class 54上」、「Support Class 32」。
後來我發覺前度同馬仔仲有兩個共通點，第一係會辭咗自己份正職，第二係好鍾意搞埋啲無厘頭嘅生意，包括還原水，最初我都唔知咩係還原水，係咪要變返未煲過嘅溪水？
比起我前度，馬仔更早跌入傳銷騙局，更早接觸精神領袖課程，我唔L想聽乜嘢「呢啲課程有得著」，「乜嘢更加認識自己」，我淨係知而家嘅馬仔除咗落力sell朋友之外，仲成日問一班舊同事借錢，有時300，有時500，佢仔細老婆嫩，一個成年男人如果幾百蚊都要借嚟開飯，真係替佢屋企嘅小朋友擔心，唔係要打落水狗，而係堅心痛。
前度同馬仔參加嘅精神領袖課程係嚟自唔同集團，但無論點都好，佢哋都打住一啲「幫人」嘅旗號，例如我已經搵到人生目標喇，而家要幫你搵埋，又或者搵錢係好容易，不過我一個人賺唔開心，要share畀大家一齊賺！
如果李超人都有呢種咁偉大嘅情操，我哋全香港人就發達喇，咁點解李超人冇呀？因為真正搵到錢嘅人根本無需要同你分享成果同埋方程式，好合理架，同你分享先至唔合理呀！
其實跟官咁耐冇理由唔知官姓乜？我份人有幾9's，我前度應該好了解，聶瞳去參加精神領袖課程？唔好玩啦，去到唔搞寸個party都唔係我啦，不過前度亦已經預備好佢嘅二段攻擊:
「我真係想你去聽下，呢個第一階段嘅願景精神領袖課程，我送畀你，真係送畀你，但你要應承我，一定要去上堂，成28000蚊，好貴架！我想你好呀！」
你想我好？但我想屌老母喎！其實我唔呃人都偷笑啦，你仲想呃返我？
雖然眼前呢個人好陌生，但我唔係嬲佢，我明白佢都唔想，我反而想揪出個幕後黑手，即係最初導佢去上呢啲堂個打靶，所以我假意答應，睇下之後會發生咩事。
少少預告，下集我踢館夢碎，因為成個課程要去深圳福田上堂，聽到都覺得凶險，而前度嘅屋企人亦搵咗我求助。
