Eason喺公開大學分享會黑面，不滿學生掛住玩電話求合照唔尊重。其實呢，「尊重」喺香港已經變成一種luxury，期望人哋對你有基本尊重亦變成咗一種戇。有大學生email個product list俾我，列埋價錢叫我送iPad、雪櫃，我亦收過唔少大學生邀約演講嘅電郵，冇寫錯我個名已經好難得，收過幾次上款「黃迪斯」，三個字都可以錯兩個字，或者直情冇上款。而且直呼對方名字，似撩人隻揪多過似邀請對方演講。稱王小姐或Daisy就可以了。寫信基本格式禮儀，小學中文課有教，不妨重溫。
所以，大學生都好冇禮貌？絶對唔係。呢張相係我最近應港大中文學會邀請演講，呢班同學好有禮貌，好專心聽，問問題好踴躍而且有深度，發邀請函給我的林同學那封電郵可以做教材。係咪公大學生差啲，港大好啲呢？又唔一定喎。我亦收過一位港大醫科生邀請我到high table dinner演講嘅來信，我怕耽誤人，通常得唔得都好快覆，等人哋有更多時間準備。嗰次我亦即刻覆okay，點知個準醫生竟然話已經搵咗另一個speaker，叫我唔使嚟，但如果我都係想嚟，或者佢可以試吓遲啲再搵個日子俾我，我當然感激到不行。搵我做後備唔緊要嘅，但大個仔喇，要學吓做得冇咁明顯。有次去另一間大學演講仲過癮，演講前半個鐘開始reception，我嗰半個鐘冇位坐，冇位企，縮埋一角以免阻住啲學生好興奮咁selfie。同學唔識我係應該嘅，但至少發邀請信俾我嗰一位同學，應該知道自己請咗乜水卦？喺入口處同嘉賓打個招呼，係咪要求太高？
年少唔等於無知，老亦唔係大曬。職場old seafood比比皆是，恃老賣老喝斥年輕人讓出關愛座嘅都見得多。我收過嘅無禮、神怪電郵，有來自各種年齡職業，不限於大學生。我想問嘅係——點解而家喺香港，「尊重」會變成咗一種luxury？唔係大學教育出咗問題，而係幼稚園教育有問題。我記得第一日返幼稚園，學嘅就係禮貌，見到老師要打招呼，見到同學要講早晨。但最大影響係家教，父母終日睇手機，憑乜叫個仔唔好玩手機？如果有一部分大學生唔識尊重人，或者因為佢地太叻跳咗班冇讀幼稚園，又或者，應該問吓佢哋父母。
