【偽中產回流英國之路remastered 1】
兩年前寫，今日睇返再改，心態有無變？
呢兩三個禮拜，心情同大家一樣唔好，情緒有啲唔多穩定。但總算有點自制，無亂用自己個網絡平台放負。除咗蒐集歷史，同大家分別同思考，亦回顧返呢個Page史前第一個破百like嘅post。睇返除咗好笑同幼嫩，仍然有一份感慨，2014、2016、2019，其實有無變過？所以當發洩，重新寫過，希望唔會悶死大家。
--------------------------------------------
越黎越想希望離開香港，相信呢個想法當年並唔只我一個有，亦肯定唔會係最後一個。老老實實，香港嘅政治環境，只係會令人討厭，未足以迫走我呢個偽中產（注：2016年呀），始終會欺騙自己响香港好似擁有好多好多。要決定離開原本嘅家，的確係一個好大嘅決定，當中考慮因素同面對嘅難題，每個人都唔同，於我以言自己嘅身體、家庭生活模式與及個女嘅將來，係佔當中好大成份。
當年响香港，自問都有一份唔錯嘅工作，供緊一間唔錯嘅偽豪宅，個女亦開始讀唔錯嘅所謂國際幼稚園。一家三口，每年可以去一兩次日本，日常消費當然都幾「中產」（真係人生何求？！）。但係，久唔久我我都問自己兩個問題：「究竟我地咁樣係唔係真係幸福呢？我地想個女將來係點呢？」
作為一個香港嘅所謂中產，我估大部份都同我差唔多，每天每月每年嘅循環無限loop都係一樣。番工搵幾萬至十幾萬，死供爛供一間似樣嘅樓，請個工人姐姐，一個星期要出去排隊食下好嘢，跟著要去兩三次日本韓國shopping同打卡。久唔久買下afford得起嘅表或者手袋（唔係top line嗰啲），玩啲懶有品味嘅「屎忽鬼」興趣。有仔女嘅就要讀國際學校，學埋晒啲古靈精怪課外活動。然後加多張Disneyland Annual Pass，去下公園，去下郊外親子下。心靈自稱滿足了，但錢無乜得剩。
咁如果唔死，剩返嗰幾十年呢？未到都幻想到！到仔女差唔多大，一個唔好彩响唔多出色，咪送去外國讀書，叫佢地讀一啲自以為搵到食嘅科，例如，engineering，business，marketing咁囉（响香港讀到「神科」就唔洗走啦！）。咁好彩遇到樓市一個半個跌浪，咪買多一間樓比仔女。到仔女讀完書就回流香港揾錢，做父母嘅就利用自己嘅偽中產connection，「安排」份合自己但唔理仔女理想嘅工。就係咁，個仔女又會跟著自己咁變成第二代中產，循環不息。結果兩代都無發達，都係搵錢、供樓同消費（好聽啲咪叫父幹）。
可惜呢個只不過係美好嘅幻想，亦係我地呢班偽中產一廂情願認為嘅美好將來。但係將來實際會係點呢？唔好講香港咁大，以世界嘅發展嘅速度同變化，將來一定超乎我地嘅想象同眼界。呢個就係我地幾代香港偽中產嘅國際視野盲點，因為我地嘅上一代都係用咁嘅模式培育我地，但係現在已經係2017年，而唔係5、6、7、8十年代。90年代之後，唔該睇下個世界運作模式變咗幾多，睇睇依家嘅世界首富，呢廿幾年變咗係咩人，幾多歲同做乜？
結果，我反反複複諗咗好多次，到底係咪應該繼續只係為咗層樓，比較物質而活呢？又想唔想個女嘅將來，由我兩公婆呢兩條高不成低不就，無視野嘅偽中產父母安排呢？佢係唔係應該有自由意志決定未來，選擇自己嘅將來呢？
上面嘅一堆問題，加上香港嘅政治環境，連埋經歷緊嘅變態幼兒教育，我同我老婆好詳細咁討論好多次。結果我一家三口去咗一次好長嘅英國之旅，四圍行感受一下環境，白撞下啲estate agent睇下屋，亂咁去下人地嘅pre-school。返到香港之後，可怕嘅事發生响自己身上，速使我地決定移民英國。下回繼續...
#偽中產回流英國之路
#Remastered
#GoodbyeHKHelloUK
#其實有無變過？
+++++++++++++++++++++++++++++++++
英國居留簽證懶人包（香港人限定）
http://bit.ly/2MfFPPZ
英國移民生活網
重要舊文重溫
www.goodbyehkhellouk.com
+++++++++++++++++++++++++++++++++
disneyland annual pass 在 Magic Key Passes | Disneyland Resort 的相關結果
Enjoy a year of magic with an annual pass! Join in the fun of exclusive events and receive valuable discounts on select merchandise, dining, tours, ... ... <看更多>