今時今日嘅環境睇到呢篇投稿，感受更深。
BTW，阿輝你叻過我，我唔識打倉頡🙈
＝＝＝＝＝＝
投稿讀者：阿輝
我係男，37歲，揸Van仔，8年前交通意外，唔記得痛咗幾耐，其實嗰陣好想就咁瞓，不過又好驚瞓咗唔會再起身，直到消防同埋救護嚟到，記得自己喺救護車上面仲同佢哋講，唔好話畀屋企人知，驚佢哋擔心，諗返起真係好傻。
幸運嘅係，我冇死，香港啲醫生真係好勁，印象中當時已經血肉模糊，唔知佢哋係點樣救我條命。不幸嘅係，我要截肢，腳冇咗，心情好差好想大叫，但係我唔敢，老豆老母日日嚟醫院陪足我全日，如果我崩潰，佢哋更加唔知點做。
我人生只係見過老豆喊兩次，一次係阿嫲過身，一次就係醫生同佢講我要截肢。
往後嘅日子，我都要喺輪椅上度過，最擔心係之後唔知點樣搵食，講起個「車」字都驚，揸唔返van仔，養唔到自己，幫唔到屋企，仲要成為兩老嘅負擔。
雖然輪椅坐耐咗已經習慣，但係偶爾見到自己冇咗雙腳，感覺仲係奇奇怪怪，當然仲有好多傷口處理時講唔出嘅難過同埋唔舒服。作為一個傷殘人士，要面對嘅問題包括適應外觀、身體勞損、日常生活同埋出外有難度、欠缺自我照顧能力，無論心理同埋生理都有好大好大壓力，仲有經濟方面，而其實截肢者屋企人面對嘅壓力同埋困擾仲大。
揸唔到Van仔，我開始進修，學打倉頡，但又要面對另一個問題，就係求助於別人嘅壓力，香港本身搵工已經唔容易，我仲要身體殘缺，膽粗粗學人send cv出去，係有人打嚟約見工，跟住我喺電話度同佢哋講自己要坐輪椅，十個有十個都會講：「咁呀，我問一問老細先，再打返畀你。」然後就唔會再打嚟，不過咁樣已經好客氣，曾經有一次對方話：「吓，傷殘？你唔早講？運桔！」跟住cut我線。我嬲到想打電話返去問候佢祖宗十八代，但諗起佢有我cv，有晒我資料，又放返低電話，同時又想告佢歧視，諗起自己當務之急係搵工，無謂要屋企人擔心多一樣嘢，所以就算數。
後來我索性喺cv上面列明自己傷殘，即刻冇晒谷氣嘢，因為完全冇人打嚟。
可能你哋會問，冇社工或者相關機構幫我哋呢班人搵工咩？有嘅，有心人好多，但空缺唔多，而且好多都係一啲例如包裝嘅工作，喺一個密閉空間好似機械人咁，我嗰陣已經覺得人生好灰，好清楚呢類工作或者會令我意志更低落，所以想試下自己搵。
搵咗一段長時間都搵唔到工，托賴最後經一個朋友介紹，去咗間賣電子產品嘅公司做文職，老闆同事都好好，冇嫌棄我，亦唔係以一副施捨嘅姿態對我，最近環境好差，明顯見到公司生意一落千丈，我主動叫老闆唔好用我，反正手板眼見功夫，其他同事都做到，不過佢唔肯，話齊上齊落喎。
嗰啲乜嘢感謝上天安排嘅說話我講唔出，一早知道個天係唔公平，我只係覺得既然條路要咁行，為咗家人，為咗自己日子過得好啲，我要堅強同埋樂觀咁樣面對。最近見到身邊有啲朋友失業，相信呢期香港都有好多人搵唔到工、被迫辭職、被迫放無薪假、被迫減薪，希望各位要堅強，有時生活真係一篤屎，只係笑又係咁過，喊又係咁過，點解要衰畀個天睇呢？好好生存，唔好難為自己。
香港人，加油！
