《如果你係上司，希望你明白咩叫「他朝君體也相同」》
公司無止境OT，令同事五勞七傷，最近同事R大病，醫生開左「無限假」，開得「無限假」，大家可以想像到，大事不妙。
我理解上，同事R會即日起放「無限假」，但責任感強嘅同事R仲返公司交低野先放「無限假」。
****************************************
呢個時間，「仆街上司出沒請注意」…
同事R唔係香港永久性居民，好想返hometown醫病。上司作出以下令我感到極為心寒舉動：
1. 聯絡HR，問同事R仲有幾多大假(Annual Leave)可以扣
2. 同事R如日後交嘅醫生紙唔係香港醫生開，係咪應該當No Paid Leave，唔當病假
3. 叫同事R估計放幾耐
4. 問同事R點安排工作
5. 大庭廣眾地講：「個病名咁得意嘅？」
****************************************
我真係好心寒…
1. 奴寵物跌親隻腳都要人show sympathy，你作為上司，最關心嘅係工作安排，Annual leave 係唔係可以扣，當No Paid Leave定當病假。人性何在？
2. 你係上司，你係高級，但你人格係最最低等個級。「個病名咁得意嘅？」，「估計放幾耐」，呢D係人講架咩？
《呀姐問我：點解你sick leave？》
「屌，病囉」，我暗啞底係咁答架。
********************************************************
試解釋下，點解你病？
● 請得SL，就預左呀姐要搵SL個原因出來。呀姐又好似世衛陳馮富珍上身，誓要搵到個病源。
● 佢當然唔係想搵到病因，再提供治療良方畀你啦。佢係想你唔好意思，以及勸籲你以後唔好病。
● SL完第二日返工，呀姐就要同你落口供。最好你prepare 埋PowerPoint， present返你SL嘅成因，病徵，最後係有咩learning，下次點樣唔病。「呀姐，成個案法經過係咁嘅，前晚OT完，12點鐘上床訓，我開左冷氣，因為我冇用條橡筋褲箍住件睡衣，冷親個肚所以病。下次我會用條橡筋褲箍住件睡衣訓架啦。」
********************************************************
其實SL 只有兩個原因：
1. 真病
2. 假病
呀姐以為「落完口供」我會改過自新，唔再SL...
● 永遠都唔明點解呀姐咁智障都做到呀姐，佢覺得自己好精明，只要質問個員工「點解sick leave」，你就會改過自新，唔再SL。
● 咪玩啦，如果我真病，我只會覺得條氣唔順。如果我假病去玩去見工，呃得你，我點會有悔意。
● 作為呀姐，相信一個員工SL真係病，就好似要相信個老公冇去滾一樣。你老公同你講「冇去滾係呃你架，我日日放工都叫完雞先返」，佢咁誠實你會唔會開心左？同樣，我好誠實話「呃你架，我鬼打都冇咁精神，我SL去見工呀」，你會唔會開心跳起yeah？
********************************************************
呀姐眼中，你SL就等於偷懶...
● SL 唔做野是常識吧？「 你SL 點解唔check email，屋企check到email 架」。真係從來都唔知我咁重要，唔check email ，我個mail box係唔係會好似人體爆炸咁炸親你？SL要做野，咪有得sick 冇得leave？
● 「D 野佢跟開架，SL 好唔負責任」。SL 個日又唔係幫手喎，SL完又係我做返哂D野，有幾唔負責任？
● 「我病都唔會SL架」，真係唔明點解呀姐會為自己咁戇鳩嘅行為引以自豪。咳到好似肺結核咁，照返工運用中央冷氣傳播細菌，係唔係要讚你叻仔？我讀幼稚園生水痘，我仲惹到全間幼稚園九成小朋友都生水痘，用我呀姐個邏輯，老師點解唔讚我叻？
● 「你睇完醫生好返來啦...」呀姐好正，只要我畀醫生睇一野，就好架啦，又可以回復正常。地鐵信號故障都幾個鐘先回復正常啦。
● 「Mary 做左3年都冇病過呀，大家要同佢學習下...」，點樣可以學習「唔好病」？Mary 多得你唔少，因為我地唔會學Mary，只會憎Mary點解唔請SL。
● 「你放左一日假架囉喎，點解仲未好返？」呀姐見你SL 完仲咳緊，佢又覺得唔抵得，呀姐，你估個醫生係哈利波特咩，唸句咒語就好返。
********************************************************
點解香港地咁刻薄？
幾時開始，公司D呀哥呀姐變得咁刻薄，日日早返遲放OT，weekend叫你唔好玩創個心，下星期又輪迴咁早返遲放OT，日做夜做又唔畀病。一SL就係偷懶，一SL 就係「你地D年青人真係唔捱得」。
點解呀哥呀姐覺得「刻薄員工」係一種成就，將心比己，唔好日日用「對Erwiana 嘅態度」對你嘅下屬啦，你都曾經係「下屬」來架。
