母親節送情人禮物
二月十四日，老婆大人無端端拋低句：「情人節根本無乜意義」。對於我呢個從來未試過情人節送花送禮食大餐嘅人嚟講，最鍾意用「日日都係情人節」蒙混過關，直頭標冷汗。由嗰日開始，我𢱑穿頭殼，應該送乜禮物補償。
結婚廿八年，送過三次禮物。第一次：珍珠耳環，大人笑咪咪講多謝，然後問幾銀，如實答，「老公，你畀人呃咗，呢隻色、size、形狀、手工，最多值X蚊。囧！」
第二次：金飾頸鏈，第二日戴返工，專登喺我面前行過，一次咁多，話好難襯衫喎，我懷疑已經喺金價高嗰時賣咗。囧！
第三次，釜底抽薪，唔送首飾，送錢，寫咗張十萬蚊支票，等大人自己發落，點知望咗眼，隨手掟番畀我，補多句：「邊有人用自己錢，送畀自己當禮物。」弊，筆錢用聯名支票戶口開出喎。囧！
經過慘痛教訓，明白首飾呢家嘢，男人識條鐡，已經十年無膽再送過，今次大人開到聲，決定膽搏膽，喺五月八日母親節，代兩個仔送份禮物。
靜雞雞摷佢個首飾箱，發現好多閃令令飾物，醒起識佢第一日，大人一直係Swarovski（唔識讀）粉絲，客廳飾物櫃儲咗好多水晶動物，既然金飾唔敢買，現金就死梗，美滿婚姻險中求，翻兜珍珠襯水晶最穩陣，value for money，肯定唔會錯，我諗。
奉勸所有男性動物，唔浪漫唔係問題，唔使誇張成優良天性咁，更加唔好學我視送禮如無物，你未必有我嫁到個大方老婆咁好運，大安旨意十年一潤，隨時無情情畀人潤一潤，咁做好鬼笨。仲有兩日，即刻𢯊起心肝，母親節送份禮物畀老婆大人、母親大人、外母大人，三個最重要嘅女人，保你天下太平，家有寧日，我諗。
真摯嘅愛情靠雙方用心經營，一分愛護，兩分容讓，經常將肉麻說話放喺口唇邊，一份讚美，一份留意情人喜好嘅細心，一份氹人開心嘅苦心，就算母親節送情人禮物，有啲兀突，只要有心，一條水晶頸鏈，就可以話畀愛人知，你心中有佢，佢肯定冧到暈，唔使諗。
今日開始唔使返工，照舊晨早起身，大把光陰，唔寫感性離任，寫老婆大人，仲可以一路嘆齋啡，一路食花生，一路諗諗端午節食糭嗰時送啲乜。
齋啡 在 減肥咖啡｜齋啡加速燒脂抗疲勞4大好處運動前幾小時喝最有效 ... 的八卦
想藉着做運動達到減肥目的，不妨在運動前喝一杯黑咖啡（ 齋啡 ），增強燃脂效果之外，還有助抗疲勞，做運動也不會感到很快就疲倦，但運動前幾時喝黑咖啡 ... ... <看更多>