我有個客做廚具，請Compliance Manager，幫佢搵到個經驗fit晒嘅求職者，將CV send咗畀HR，對方亦覺得好適合，喺電話度夾緊見工時間之際，我話：「有樣嘢想同你講，呢位求職者有案底，我可以代佢解釋下。」
HR：「咩案底？」
「佢兩年前醉駕，雖然冇造成傷亡，不過佢話已經知錯，而且係錯得好緊要，佢同我講已經戒酒，停完牌亦冇再揸車，因為答應咗老婆同個囡會改過。」
正當我諗住加強詞彙去補充，估唔到對方HR咁講：「都唔緊要嘅，同份工唔關事，要畀人有機會改過，公平啲。」
我當時知道佢有案底，首先了解係犯咩事？有幾嚴重？再決定send唔send呢份CV出去。不過一定要喺佢上客人公司前講清楚，唔可以因為我處理得唔好，而令對方產生負面諗法，變相未見工先打求職者八十大板。
我將個心交咗出嚟喇，跟住就睇個天。幸運地，呢次遇到一個好客，一個好HR，最後仲請埋。
HR之後有問過我：「你應該唔止得一份CV㗎，做咩當時咁有heart去sell佢？你哋識㗎？」
「唔識㗎，盡做咋，學你話齋，要畀人有機會改過吖嘛。」
我冇同HR講得咁細緻，其實當日呢位求職者上嚟獵頭公司見我嗰陣，佢講講下喊咗出嚟，男子漢大丈夫流血不流淚，佢竟然喺一間狹窄嘅房間中對住我流馬尿，兩個麻甩佬，咁嘅場景，咁嘅氣氛。
佢喊，係因為留案底之後搵工搵咗好耐，心入面有兩種委屈，一種係灰心，失望，同埋不斷遭受白眼；另一種委屈就係經濟出現問題，雖然佢老婆有工作，不過始終有小朋友，衣食住行書簿費樣樣都係錢，生活壓力好大。
我當時其實嚇親，反正唔知點算好，我就由得佢盡情喊，因為返到屋企未必可以對住老婆仔女去釋放呢種情緒，不過我記得佢喊個樣，完全表達出「日子好難捱」呢5個字。
每個人都有自己嘅難處，有案底搵工難，冇案底搵工亦唔代表容易，有好多痛苦同傷心係表面睇唔出，著到身光頸靚但匿埋捱麵包大有人在，最緊要唔好諗埋一邊，甜的吃，苦的也吃，好景不常在，但困境都唔會冇盡頭。
感謝呢位求職者願意分享自己嘅故事，佢話自己都捱得過，其他人一樣得，特別送畀搵工處處碰釘嘅朋友。
食住fit 在 [食極吾飽點減肥] ? 拆解假肚餓｜5 招提升飽足感 - YouTube 的八卦
[食極吾飽點減肥] ? 拆解假肚餓｜5 招提升飽足感｜飽住瘦｜ 食住Fit | 減肥無障礙| 大食變細食🉐️✓. 77 views77 views. Premiered Jul 9, 2022. ... <看更多>