遲咗攞出世紙，當然唔係唔記得，而係因為一路都未決定到 #小怪獸s 個中文名。
一直都覺得改名呢件事好緊要。本來想將個神聖任務交畀爺爺嘅，但佢就覺得應該將機會留番畀我哋；阿太日常喺大學主修中文，文字造詣遠比我好，不過佢都係意屬由爸爸出手。咁就好嘞，我想講，其實我期待咗好耐😜
期待還期待，到真正實行嗰陣，要考慮嘅嘢遠比想像多。想有意思，但要顧埋平仄；要諗用字，又要睇下有冇歧義；因為一次過改兩個，所以想兩兄妹個名可以有啲關連。另外我哋仲要過風水師傅嗰關，所以，係真係可以諗爆頭嘅。
老實講，關於個名，我諗咗超過五十對組合，但係唔係自己唔滿意，就係畀風水師傅話筆畫唔啱；我始終堅持意思最緊要，又要兩個名有關係。最後平衡晒咁多個考慮，結果公布 -
#怪獸仔，取名思行，自《論語·公冶長第五》。意思係希望阿仔無論未來做乜，都必先思後行。我做嘢嘅理念係唔駛太過瞻前顧後，就正如出處嘅原句：「季文子三思而後行。子聞之，曰：『再，斯可矣。』」連孔子都認為諗兩次就夠，但係諗過先做，依然係重要嘅；
#怪獸女，取名思齊，自《論語·里仁》。「子曰：『見賢思齊焉，見不賢而內自省也。』」希望阿女向好嘅人好嘅事學習，從而成為一個更好嘅人。
尋日終於攞埋出世紙，鬆口氣嘞。以「思」作為阿哥細妹嘅連繫，望於亂世之中，佢哋可以透過思考保持清晰頭腦，懂分黑白，明辨是非；兩個嘅英文名都以”A”起首，就純粹咁橋啫。記住，開心健康，善良正直，比考A考第一重要太多。成長於今日香港唔容易，但條路再難行，爸爸媽媽都會陪你哋一齊行。
關於改名，其實仲有個小型隱藏關卡嘅。話說諗名嗰陣，我突然諗到佢哋可唔可以同我有番些少關聯呢？爸爸同仔女嘅名一般唔會重複用字，咁就惟有喺意思入手。我叫家謙，一提到謙字，就例必膽拖君子；思行思齊俱出自《論語》，其中一個原因，就係《論語》係四書之中論君子最多嘅一部。另外，李白又有首詩叫《君子有所思行》呢，嘻😁
Btw，兩條友仔個睡姿一樣嘅🤣
我挨之：www.instagram.com/vinceng88
太挨之：www.instagram.com/ahtaidailylife
