半夜三更又係失眠好時候～
今日我去超市買嘢時，突然好想食生勾勾，於是我掉低睇緊食材嘅雞爸，衝去壽司櫃度望生勾勾。肥美吞拿魚一直係我最愛🤤不過價錢⋯🤣幾塊都百幾二百。
我同其他人一樣企喺櫃前眼望望，有對情侶同樣喺度睇吞拿魚。女朋友同男朋友講：「買啲靚嘅食呀？」
同時間，我拎起一盒價值68蚊嘅吞拿魚，即係頭頭尾尾嗰啲。女朋友見到就同男朋友講：「揀呢啲食嘅？」
男朋友：「唔係個個食得起靚嘢嘛」
女：「咁又係，佢都應該食唔起，睇佢都應該得自己一個。」
我冇回頭望佢哋，衝返去搵雞爸，好高興咁拎住盒吞拿魚同佢講：「68蚊有啲肥肥吞拿魚呀！」
雞爸：「咁平嘅？碎嗰啲呀？」
我：「係呀，咪又係咁食！」
雞爸：「係呀」
『食唔起』的確係真嘅，亦係『唔捨得食』。雖然聽到對情侶咁講係有啲un耳，亦幾唔舒服。不過鬼叫自己唔爭氣～以前我都會諗住結婚一定會去外國影幾輯婚紗相，不過到真係要影嗰時，問過市價後，我都臨時縮沙了。我仲好記得早排我同雞爸傾計，講開影相價錢，到最後我哋兩個都係：「不如留返筆錢囉？影相啫，俾班仔女食咗佢好過啦」
雞爸問：「你會唔會唔開心㗎？覺得好委屈㗎？」
我：「唔會啦，相啫，留個錢俾佢哋傍身好啲，遲啲好景啲，喺香港捉埋b婆同雞一齊影仲好啦」
我哋一定會等到好景嘅時候！
其實68蚊生勾勾都好好食，我食唔岀同百幾二百有乜分別，或者易滿足都係一件好事。
#雨過後總會晴天
#比上不足
#但都仲有得食
#只係有啲嘢必須要取捨
#我哋唔係大富之家
#但係一家人齊齊整整就好了
#點解多一隻貓就會成個世界同心態都變哂
