呢幾日極為窩心，無論係fb、email甚至響條街行，都不斷收到各方前來表示想支持贊助我紅館嘅訊息；最特別係，當中99%都係中小型本地小戶，駕駛學校洗衣店蛋糕店包羅萬有，甚至個體戶都有，實在十分可愛，睇到我對住個電腦都笑曬。
而我意識到，呢次演唱會，原來已經唔係我個人嘅事。
香港各行業被大集團壟斷嘅情況，其實一直都令大眾厭倦，演唱會或各娛樂事業亦然，睇睇每個演唱會嘅一片黑就知道。當天我一直申請呢個場地不成功，再反覆申請，姿態上亦係一種對呢個制度嘅抗議，結果唔理咩原因（怕咗我？）佢地終於批咗，又點會咁容易就落入返一貫嘅做法呢，必定會借呢個機會去嘗試扭轉一d「常規」，呢個大家可以對我有多點信心。
大家積極想參與其中，除咗對我嘅支持之外，其實更加係一種群眾empowerment，想同個社會講，唔一定要大富大戶、唔一定要向強權屈服先可以生存到，小商小戶互相支持亦絕對係一個可行嘅方法。呢幾日，我再次強烈感受到香港人嘅人情味，香港人嘅強勁力量。
知道昨天出現有群眾私下發起眾籌，本菇心存感激，但眾籌牽涉人數眾多程序亦比較繁複，現階段有很多構思同想法仍在落實中，暫時不太適宜接受這種贊助住，待大綱稍定，需要大家如何支持，將會盡快公佈。況且，可能我個人比較咩，總覺得無功不受祿，未到完全無辦法我都唔想動用到勞苦大眾幫我籌期.....又其實，大家只要到時落力買飛，就係一種最有力嘅眾籌！
大家唔洗擔心，我同我嘅伙伴正在積極研究，會先用盡自己有嘅方法，甚至大家意想不到嘅方法去做，所有訊息email我都會親自逐一細閱同回覆，希望各位表示想支持嘅良心商戶俾多少少時間我地。
我保證，今次一定會令最多小商戶及大眾嘅有心人能夠參與其中，令呢個變成一個完全屬於香港人嘅演唱會。
補充一句：香港人勁抽！！！！！！
衷心感激。
