《朋友同我講「其實你係好彩嘅，可以體會到梵高嘅心情」》
話說我本書已經推出市面十日，呢十日，我聽到好多好話。
「你本書笑到我失禁呀...」
「我唔敢喺地鐵睇呀，笑到好似食咗白粉咁呀」
「好易入口呀，好代入到我打工仔嘅生活呀...」
聽到呢一連串嘅「好話」，我係懷住感恩嘅心...無論呢啲 「好話」屬真屬假，我都照單全售。銷量未有任何概念，但收到嘅PM，口耳相傳嘅評價都係正面嘅，覺得我無呃砰，呢件事確係令我感到安慰。
一直以來我都無咩在意個銷量，因為我覺得唔慌會賣得多...我深明平時click 個like 好易，但要人拎錢出來買係難過叫佢簽器官捐贈卡嘅。
對銷售唔抱太大嘅期望，然後朋友同我講：「其實你係好彩嘅，可以體會到梵高嘅心情」
我：「此話何解呢？」
朋友：「你諗下，唔係好多人可以體會到『生前作品不被重視』嘅感覺，可以代入梵高嘅感受，係唔係爽先？」
我：「呀！你真係一啖砂糖一啖屎啦。你點知我啲作品只係『生前不被重視』？你意思係死後我啲作品有人賞識？」
朋友：「唔係喎，我講『生前作品不被重視』，呢個係發生緊，已知嘅事，而你未死呀嘛，未知個啲野就uncertain嘅，費事過早落判斷，但睇個走勢，極有可能你死後都無人重視」
對於朋友呢種仆街式安慰，真係好嬲又好笑。
※※※※※※※
一向都覺得我本書係唔使sell 嘅，因為我相信姜太公直勾釣魚嘅theory，願者上釣，讀者自然會買，hard sell 無幸福.....
但朋友同我講，就算劉華係票房嘅保証，佢傷咗都透過video 宣傳新戲。就算係董太叫人洗手都叫N 次啦，你出書點都要日日講，時時提啦。朋友都有佢嘅道理，所以我都跟隨慣例，繼續宣傳我本書。
PS. 我知道身邊嘅朋友點解會買我嘅書，個原理就好似朋友個女參加咗女童軍，拎咗疊獎卷要大家拍硬檔咁，點都會買來支持下，所以我非常感謝各位善心嘅朋友。
#姐死姐還在
#三年零八個月
#買咗新書未
#我在深深體會梵高嘅心情
