咦？好似就到農曆新年了吧？每次拜年，又係一眾弟兄姊妹和三姑六婆們的角力戰— 畢左業未呀？打緊咩工呀？人工幾多呀？有冇女朋友呀？幾時結婚呀？幾時買樓呀？要不要來互相傷害呀？
我覺得這個現象其實幾奇怪— 又唔係真係咁熟，其實我賺幾多、買咩樓、今個星期上左幾多次床，真的會有人有興趣知道嗎？
我在英國也有兩三年，也跟過我老公在聖誕節到德國的老家「拜年」，一樣都係一班十年冇見嘅三姑六婆、而我作為這個家庭裡的同志伴侶，仲要係一個華人，理論上應該會被當成人體奧妙展的展品陳列，成為大家由上至工作、下至喜歡的姿勢都要問一遍的焦點吧？
但結果係— 無人問過我做咩工、賺幾多、點解入門咁耐蛋都冇隻bla bla bla...
咁到底一大班親戚坐堆一檯幾個鐘講啲咩呢？講天氣、講旅遊，這是很基本的，我去左法國買食材、你去左比利時買巧克力、佢去左奧地利滑雪，歐洲好大，就算係同一個國家，都唔會有人去得晒（唔好話咩，我住倫敦都未去過蘇格蘭），每人淨係update 返自己呢一年嘅遊歷，再互相交換下意見，round一個table 已經要一個鐘。之後就係啲「歐豬」野飲飲食食最開心，講下食緊呢餐飯點煮、講下杯紅酒，又講下家裡十萬款啤酒，總之沒完沒了的。
食飽飯後，大家又會講下興趣，自己平日會做啲乜，玩咩運動乜乜物物咁，然後又想下當年咁，突然間就四五個鐘，開心送客。
你問我，點解華人社會拜年會好似黎互相傷害咁？其實講到尾，就係一個「悶」字。
我唔係話拜年好悶，而係一眾三姑六婆本身個人好悶。你諗下，佢隨時好可能係幾十歲人，做左大半世人野，將所有時間同心力仲有精神都全放在家庭裡，佢對外界事物不關心、也不好奇，不要說興趣，大抵連真的談得上話的朋友也沒多少個。你唔好以為呀六嬸故意難為你，可能佢在家裡，都係咁樣同小朋友溝通：「做曬功課未呀？默書幾多分？溫左小測未？」而自己老公嘛，就是「出糧未？幾時加人工？老闆有冇話升職呀？」
佢只係將平時那一套搬到你身上而已，沒有惡意的，只是數十年來都是這麼悶蛋。
對了，為什麼華人拜年又不講旅行？好笑～ 邊個香港人唔熟曼谷多過銅鑼灣？個個去台灣隨時多過去元朗呀！咁仲有咩好講？結果，又係一個悶字。
留意返，呢篇文並唔係叫你繼續忍受這些沒營養的話題，而係想提你，不如趁新年為自己許下一個目標，為自己發掘一些興趣，讓自己成為「一個有趣的人」，我相信你的拜年、以至平日的社交，都會變得愉快起來的。
#識我嘅朋友應該知我好吹得
#有我在場好少有冷場
#人人高潮迭起爽個人仰馬翻
#講笑姐
#拜年時我都係默默地食野
#大人講野細路仔唔好插嘴
#有咩你問我呀媽啦
#我有權保持緘默
#有人問之前買左四磅重嘅火腿點煮
#搽蜜糖焗就好
#塊豬皮脆到高潮
#結果兩個人食左三日先食得晒
#撞鬼咯
#切粒炒飯都好好味
