自從知道咗西營盤站延遲嘅秘密之後，我就再唔敢搭港島綫（彩蛋三）
我有個秘密。一直以嚟我都以為自己隱藏得好好。直至嗰晚收到一個電話，先發現自己咁諗係錯得好離譜。
「賈彥，廿五歲破格成為『K.L.D.』嘅成員，不論體能格鬥、智力抑或知識測試都取得極佳嘅成績。不出兩年就成為組織嘅分隊長，五年之後嘅今日，仲成為幹部之一。」
聽到呢度我並冇慌，而係冷靜咁分析對方究竟係邊一號人物。初部推斷，呢把女聲嘅主人應該相當年輕，年紀絕對唔會超過二十五歲。佢冇考慮過用變聲器，究竟係因為疏忽，定係覺得冇呢個需要？
－－－－－
【植入式廣告】《西營盤》實體書現已登鈑各大書局！
彩蛋一：
http://bit.ly/2bVS0uL
彩蛋二：
http://bit.ly/2c1smsI
－－－－－
「呢啲資料，其實好容易就可以喺內部人員口中透露出嚟。組織一早預計到……」
「咁我不如講一啲只有你先知道嘅事？」少女道。
「譬如呢？」
「譬如，上年四月，你到底係點樣喺西營盤站下面嘅連環爆炸下生還。」
我唔會否認自己係有一絲吃驚。但我好迅速咁壓制咗呢種感覺。過去曾經發生過好多類似嘅事，如果咁易就動搖，我就冇資格上到嚟呢個位置。
「妳可以繼續。」我冷淡咁回應。
況且，對方可能只係知道面個浸，未必清楚「嗰一部份」。
「據我所知，複製西營盤站月台度應該係有個防爆室係可以阻擋爆炸。」少女繼續講。
「冇錯，我就係趕得切喺爆炸之前入到去，所以先逃過一劫……」
「事實上真係咁？」少女問，「咁啱我有個消息來源指，因為個防爆室係秘密建造，喺冇機會測試嘅情況下，喺裡面生還嘅機率其實只係得三至四成。」
「妳……」
點解佢會知道呢個情報？照道理，應該只係得我同埋另一個「人」知道，唔通……
「可能你會答，自己咁啱就係幸運兒，但我並唔係咁睇。如果我冇估錯嘅話，你確實冇死喺大爆炸，但都受到好嚴重嘅傷，我有冇講錯？」
短暫嘅沉默之後，我決定咁回應：「冇錯。」
呢個係事實，雖然我經歷過好多次危機。但嗰一晚，無疑係我第二次最接近死亡嘅一晚。我到而家都忘記唔到當時嘅絕望感。
「受到重傷，係冇任何人…甚或地底人幫助嘅情況下，到底係點樣可以返上去地面呢？」少女繼續追問。
「妳係咪想講……我已經被幔特契所『收割』，咁就可以解釋到所有嘢？」
「我聽過另一套講法，就係你其實係你孖生兄弟賈亮假扮。」少女接住講，「但唔係，我認為呢兩個可能性都唔正確，仲有第三個可能性。」
呢刻，我再隱藏唔到自己心裡面嘅驚訝。點解？因為少女距離個答案其實只係差最後一步。
「到底，身為『人類』，點可以打得嬴亞幔同幔特契？真係好神奇……」
只係差最後一步，就可以講出我真正嘅秘密。
「……以我嘅知識範疇，我知道除咗『血刑』呢個受到咀咒嘅儀式之外，仲有另一樣嘢，可以治療世間嘅所有疾病同創傷。」少女講到呢度停咗停。
「藍色晶片。」
雖然只係簡單嘅四個字，但呢個確實係正確答案。
「妳打嚟到底所要啲咩？」
「你唔好誤會，我唔係想威脅你。我只係想進行一次交易。」少女回答，「一次我同你都會滿意嘅交易。」
「係點樣嘅交易？」
「等到時機成熟嘅時候，我希望可以加入『K.L.D.』。只要你應承我，我就唔會將你嘅『秘密』公開出去，同一時間，我會用我嘅知識，嘗試幫你哋組織解決『深水埗』嗰邊所發生嘅事。」
「好。」
我並冇多作考慮就應承咗。呢刻只可以用呢個權宜之計，以防對方做出自己控制唔到嘅事。
「就咁話，賈彥，我好快就會再通知你。放心，我向來都係好守信用嘅人。」
「呢層，我諗單純聽電話真係唔會知道。」
「哈。」
「喂，妳介唔介意話俾我聽，除咗晶片呢件事之外，妳仲知道啲咩？」
短暫嘅沉默，有一刻我以為少女已經收咗線，但並唔係……
「七年前，曾經有一架機號HC113嘅客機，因為某個意外喺太平洋上空失蹤。」少女回答，「呢件事基本上係冇任何媒體報導過，但我知道……機上面有位乘客就係叫做賈彥。」
嘟、嘟、嘟……
通話結束之後，有一段時間我都未能平伏心情。
剛才已經提過，我過去都曾經遇過好多危機。只係冇諗過，最令到我感到威脅嘅一次，居然係接聽呢個電話。
呢次對話之後一星期，我終於查到呢個電話到底係由邊個打嚟。
我有種感覺，對方早就知道我會查到佢，但佢係完全唔介意。
「反正，我加入組織個陣你都會知道我係邊個，只係遲同早嘅問題。」嗰次見面之後，少女係咁同我講。
既然係咁，文冰瑤小姐，今次就俾個機會我研究下妳到底有乜嘢秘密。
（彩蛋三 完）
多謝各位支持，我哋 150 share 繼續呀。
註：有追個舊故同買過兩本書嘅讀者應該會理解到更多。
＝＝＝＝＝＝＝＝＝＝＝＝＝＝＝＝＝＝＝＝＝＝
有咩都可以留言，我會盡可能覆哂佢！
（帶定頭盔先：本故事純屬虛構，如有雷同應該巧合。）
FB： 有心無默
個人ac：（歡迎 follow ～）
https://www.facebook.com/myechoofheart
IG：echoofheart
【解悶良伴】
《絕命上映》
http://bit.ly/1XWiVud
《絕望走廊》
http://bit.ly/25qf91O
《醉後的藍》
http://bit.ly/1Pekb4K
《無限次告白》
http://bit.ly/25PaQxi
《正負人生》
http://bit.ly/290huFB
《時間守衡者》
http://bit.ly/29l7aIZ
《同居貓物語》
http://bit.ly/29B6JL1
【情人節中伏系列】《飄浮的眼淚》
http://bit.ly/29E6mmx
【情人節中伏系列】《心的謊言》
http://bit.ly/29UiOd3
《最近距離的來信》
http://bit.ly/2bxNXtI
藍色晶片 在 藍色晶片 - YouTube 的八卦
苹果芯片梦| 成立ARM | M1芯片的诞生之路| 苹果芯片如何光速超车？ | 在ARM架构的深厚积累（苹果芯片成功原因之一） | 芯片工艺的进步（苹果芯片成功原因之二） | 供应 ... ... <看更多>