《年初一，最好都係留喺屋企》
我屋企同其他人有啲唔同，就係我哋年初一係好少拜年嘅。
就好似今日咁，我哋幾丁友，會做隱蔽青年，足不出戶。
曾經，年初一都係我哋嘅戰場，
仲係小學生嘅我同雙親一日遊遍港九新界，
嗰時鐵路唔算完善，次次都迫巴士，享受幾近窒息嘅快感。
搭車搭到三魂唔見咗七魄，
去到親戚度仲要有例牌Formula，就係：
恭喜發財 -> 親戚讚乖 -> 媽子話「乖鬼呀！不知幾難教」-> 斟茶 -> 雙方寒暄/暗地比較 -> 送禮 -> 被回禮 -> 唔收(叫對方唔好客氣) -> 被逼收 (唔收即係唔畀面)
經過呢條Formula嘅磨練，我初一就好似品茶咁，水仙、普洱、鐵觀音逐一上場，同時感受佢哋將盒曲奇推嚟推去嘅畫面。
突然響起《喜劇之王》中外賣仔嘅一句：「幾廿歲人，嗰四十蚊唔夠喺度推嚟推去！不如我請丫！」
早喺廿年前，我就有呢個想法：「幾廿歲，曲奇餅都喺度推嚟推去！ 不如畀咗我食算啦！」
總之，我覺得拜年此事一切從簡就好。
或者我嘅家人都埋藏住懶惰嘅基因，
呢種戰場式嘅拜年，隨著我同家姐長大後，漸漸減少。
甚至家族都開始跟隨團拜模式，將「去8個地方」，變成「8個家庭喺酒樓坐兩張大枱」。
一個下午搞掂，熱玩嘅「親戚問答」同「爭住請客」都由每年玩十幾次，變成一次KO。
一不做二不休，
索性將團拜掟去初四初五初六，釋放大年初一。
經過多年奮鬥，我哋終於可以喺年初一安在家中。
年初一喺屋企有咩要做？
就係冇咩嘢要做。好廢但好珍貴。
屋企人會煮下嘢食，大家悠下悠下咁，連樓下都唔落。
全盒嘅糖果純粹為自己預備；薯片杯麵早已上倉散落一地。
我哋冇咩節目，但懂得自娛。
年初一留喺屋企Hea，
可能係全年最廢嘅一日，但都係全年最安心嘅一日。
有時靜靜哋，其實都唔錯呀。
IG: cheungson88
