以前細個咩類型嘅侍應都做過，記得曾經喺葵芳新都會一間叫維苑餐廳（而家仲有冇？）做暑期工，嗰時同個同學仔一齊去，點知個部長嫌佢手腳慢，返咗半日就叫佢走，你知啦，暑期工除咗搵錢，仲想同friend一齊玩㗎嘛，結果我就陪佢一齊走。
茶餐廳侍應就相對舒服，可能我同啲樓面水吧收銀打成一片，送外賣就蛇多陣，又有貼士收，仲包兩餐，對一個小朋友嚟講真係慳到好多錢，當時個老闆每晚收工都塞兩支十字牌鮮奶畀伙計，或者呢啲就係小店嘅人情味。
做酒樓兼職侍應就辛苦啲，總之一放學就去返工，最怕係有人擺酒，次次起條魚都起到爛晒，加上唔識得用一隻手夾住兩隻匙羹分餸，鑊鑊都好論盡，遇著嗰啲懶客氣嘅人仲麻煩：「你要吖，你要吖，你要吖。」明明你都隊咗隻碗上轉盤啦，求下你畀我放低好唔好？
你推我讓一輪之後，我夾住啲餸360度轉足一圈，轉到手都軟埋，「呀，咁我唔客氣喇。」頂你個肺早講吖嘛！
其實當時讀大學班同學個個都好有錢，我記得有個未畢業已經有架超跑，另外有一個剛畢業就派卡片，印住個職位係Director，原來係爸爸開咗間公司畀佢。有次同佢哋講我兼職做侍應，一個二個嘅樣好似發現新大陸咁驚訝，不過我從來唔會隱藏呢啲經歷，冇當日嘅我，就唔會有而家嘅我，屋企即使唔係大富大貴，我都好proud of自己嘅人生，起碼我F.3之後已經冇問屋企拎過錢。
繼續發放Youtube儲落嘅倉底貨，因為睇返個廚師將條魚起骨，諗起當年做酒樓侍應嘅日子，希望你會鍾意睇呢條去到橫濱拍嘅片啦！
https://youtu.be/Z-QI8HbHidE
