在香港時嘅偽中產日子與在英國的真生活 (1)
唔再想留响香港我只係其中一個，亦唔會係最後一個。老老實實，香港嘅政治環境，只係會令人討厭，未足以迫走我。要真係要決定移民，真係會係一個好大嘅決定。當中原因亦每個人都唔同，而子女嘅將來當然係一個好大嘅考慮。
當初响香港，自問都有一份唔錯嘅工作，供緊唔錯嘅樓，個女亦開始讀唔錯嘅所謂國際幼稚園。一家三口，一年亦可以去一兩次日本，出街嘅消費當然都幾「中產」啦。但係，久唔久我我都問自己兩個問題：「究竟我地咁樣係唔係真係幸福呢？我地想個女將來係點呢？」
作為一個香港嘅所謂中產，我諗每個都同我差唔多，每個人每年嘅循環都係一樣。番工搵幾萬至十幾萬，供番一間似樣嘅樓，請個工人姐姐，一個星期要出去排隊食下好嘢，跟著要去一次半次日本shopping同打卡，久唔久買下afford得起嘅表或者手袋（唔係top line嗰啲），有仔女嘅就要讀國際學校，重要學啲古靈精怪嘅嘢，加多張Disneyland Annual Pass，去下公園，去下郊外親子下。
而一生呢？未到都想象到！到仔女差唔名大而响香港唔多出色嘅，咪送去外國讀書，叫佢地讀一啲自以為搵到食嘅科，例如，engineering呀，business呀，marketing呀（响香港讀到「神科」就唔洗走啦！），咁好彩遇到一個半個升浪，咪買多一間樓比仔女。到仔女讀完書番香港，就用自己父母嘅connection，搵啲uncle/auntie「安排」份工比佢。就係咁，個仔女又會跟著自己咁變成第二代中產，循環不息。結果兩代都無發達，都係搵錢同洗錢。
而厘個只係美好嘅結果，而以上所有都只不過係我地厘班偽中產幻想出黎嘅所謂美好將來，而將來實際係點，唔好講香港咁大，就連仔女嘅職業，而依家世界嘅發展速度，一定超乎我地嘅想象啦！而厘個就係我地厘一代香港偽中產嘅國際視野盲點，因為我地嘅上一代好多都用咁嘅模式培育我地，但係現在已經係2017年，而唔係5、6、7、8十年代，90年代之後，個世界變得快咗極多，唔該得閒睇睇世界首富，厘廿幾年變咗幾多？
所以，我反反複複諗咗好多次，咁嘅生活係唔係只係為咗比較而活呢？而我又想唔想個女嘅將來由我兩公婆安排呢？佢係唔係應該有自己嘅自由意志呢？佢係唔係應該追求快樂呢？佢嘅將來係唔係應該比番佢自己選擇呢？
上面嘅一堆問題，加上香港嘅政治環境，再加上幼兒教育嘅變態，我將全部問題同我老婆好詳細咁討論。當然討論咗好多次，最後我一家三口去咗一次好長嘅英國之旅（目的地唔係London，因為就係唔想同香港一樣！），四圍去，感受一下環境，白撞下啲estate agent睇下屋，亂咁去下人地嘅pre-school。
最後，我地番香港之後就決定移民英國。而到咗英國嘅生活同香港嘅偽中產生活有乜大分別，下個post講。因為太長太多。
#香港偽中產 #英國真生活 #樓奴 #今時今日點諗仔女將來做乜 #世界變得好快 #仔女嘅前途係屬於佢地嘅 #移民唔一定有血有睙
