補習時, 教中國文化, 提到夫妻相處之道:
‘兩人相處, 貴在相敬如賓, 夫妻關係並不是後期宋明理學的極端男尊女卑, 而是處於較平等的關係 必要時更互相提點, 發現對方有錯便要指出, 而並不是一味奉承……’
‘例如, 古時候, 晏子是齊國的國相.’
‘一次他外出時, 車夫的妻子從門縫中偷看, 見身為車夫的丈夫拉車時, 十分得意.’
‘車夫回到家, 她的妻子要求離婚.’
‘丈夫問她原因, 妻子說: “晏子身高不到六尺, 做齊國的國相, 揚名諸侯. 但他外出時, 志慮深沉, 面無喜色. 而你身高八尺(即約今日6尺左右), 只給人做車夫, 卻趾高氣揚, 覺得很滿足, 我因此要求離去。” 從那以後, 她的丈夫一改故態.’
‘所以呀, 在座各位同學, 如果你地有拍拖嘅話, 唔好成日掛住氹佢, 間中都要點醒佢架!’
這時候, 有一女學生, 面露愁容, 衝口而出說: ‘唉, 有拖拍就好啦! 我學校果班40人, 得10個男仔咋!’
此語一出, 不少女同學均附和, 竊竊私語地說:
‘我地果班仲衰呀, 全班得5個男仔, 當中4個仲要乸乸地!’
聽罷, 女同學們個個頭耷耷, 覺得自己中短期好難發市.
由此可見, 好多學校, 真係陰氣好重!
男同學們則喜形於色, 攞晒彩咁講:
‘無計啦, 而家女多男少, 物以罕為貴嘛! D女仔追我地就差唔多!’
‘我班D女同學全部都係豬扒! 無樣無身材……’
為免男同學們繼續吹噓下去, 我說:
‘好啦, 而家貼下DSE題目勒, 下年嘅熱門題目就係…….’
成班同學, 立即收聲, 奮筆疾書喪抄貼士;
但我的內心卻翻騰不已!
回家途上, 我覺得要為那些信心盡喪女生說一些公道話,
也權當是回應那些自以為是的男生吧!
是的, 近年女多男少, 已是不爭的事實.
從香港出現了剩女或盛女一詞, 便可見一斑.
三十年河東, 四十年河西, 男人們覺得吐氣揚眉的時間到了!
從數字上看, 可能是對的.
但物是否一罕便貴, 卻是未必.
從前男多女少的時候, 男仔為要得女仔歡心, 都十分上進有為, 自我增值.
因為要在芸芸男孩子中脫穎而出, 希望得到女仔青睞嘛!
偏偏, 現今男少女多, 男的恃寵生驕, 自恃罕有, 反易自甘墮落.
問問一些老闆, 現在的大學生是什麼樣子的?
曾聽說有男大學畢業生來見工, 媽媽全程陪伴左右, 連面試也是媽媽代問代答!
30歲以上男人, 仍由爸媽養的大有人在;
結婚時, 由家人支付婚宴的, 比比皆是!
以前, 男人等事業有充足準備才向女孩子求婚, 然後一個人擔起頭家;
現今, 男人結婚後才去準備事業, 然後搵成頭家擔起佢一個人!
男人貴在有擔當, 試問現在貴在哪裡?
也有些男仔經常詬病女孩子的外貌, 又要求做他女友要外貌完美.
成日話身邊女仔樣衰, 身材矮, 無胸, 手臂粗, 象腿, 皮膚差……
對她們如動物般評價, 完全不尊重人.
我想問問這些男孩子: 你成日批評人地外表差, 你自問又好好咩?
你話女人胸細, 你地男仔又有無42寸胸肌先?
你話女人樣衰, 你地男仔不又是眼細牙黃鼻扁嗎?
你話女人身材差, 你地又有無六舊腹肌倒三角形身材?
識話人唔識話自己!
你本身有沒有之前中環成班外國男MODEL嘅身型?
有些做人老公的, 更怨老婆生完仔女後身材走樣!
街上好多麻甩佬, 則對行過嘅女人評評點點!
但呢班諸兔挑剔的男人, 又唔低頭睇下自己個大肚腩同兩側鬆泡泡的手臂肉, 或摸摸自己個禿頭,
遠睇不就是成群白皮豬混種蝙蝠河童嗎?
男仔也常說: 女孩子只喜歡名牌, 追星, 無品味.
頂, 男仔們又有什麼品味了?!
近年十個男生, 九個是宅男, 日夜只對著電腦, 沉迷ONLINE GAME同睇波.
係網上嘅成就, 大過現實上嘅成就!
幾日前, 便聽聞有個男仔, 因在網上GAME的角色被‘群毆至死’而嚷著要自殺!
現實不少男仔, 出街就拎住部PSP, 玩GAME就用老翻, 軟件全DOWNLOAD, 揸車改大聲死氣喉扮超跑, 自欺欺人, 仲覺得好自豪!
其實, 什麼行為也有高低雅俗之別, 即使是閱讀也有分睇金庸和睇咸書, 但在此不細表了.
但近年在街上拿金庸小說看的男仔, 你見過幾多?
反之, 不少女人, 的確愛名牌, 愛追星, 但追求過程與男仔有些不同.
大部分女人們會死慳死抵, 節衣縮食, 都要追番個正版名牌手袋.
她們以買冒牌貨為恥, 覺得一旦被發現用假野, 會永不超生, 故絕不自欺欺人.
知恥, 是好事.
女孩子也追星, 但為了親近這些偶像, 我見過不少女學生走去學日文, 韓文
你何曾見過男仔鍾意 C. RONALDO 或 MESSI 而走去學葡萄牙文或西班牙文?
好學, 也是好事.
當然, 我見過不少男學生, 有修養, 謙虛, 有禮, 有品味, 好學且有擔當, 這些人性格多較內斂, 也懂得男女要互相尊重.
相反, 淺白之徒, 便喜歡上網力陳港女不是, 在街上對女人指指點點, 覺得尊重女性就是丟晒男人嘅架, 打女人才是人生最高的成就!
其實, 香港不少適婚女人沒有結婚, 不是不能結, 而是不想是旦搵個麻甩佬結!
人工高過你, 學養高過你, 品味高過你, 英文好過你, 口才叻過你, 對感情又專一過你, 連身高都分分鐘高過你……
頂, 我係女人的話, 真係寧願單身都好過同你!
內地不是男多女少嗎?
即使要嫁, 香港以外的男人也是一個好選擇, 當中更有不少是好質素.
ANGELA BABY, 蔡少芬等不正是選內地男人為伴嗎?
香港女人學貫中西, 見識廣闊, 正是內地女人所缺乏的;
香港女人溫柔婉約, 英文流利, 也合西方男人的口味;
內地男人及西方男人一旦黎香港娶妻成風,
港男們, 無論身型, 身家, 身份, 你地有邊樣夠人家揪?
女生們, 好好裝備自己吧!
不要妄自菲薄, 紆尊降貴就人家, 乞求人垂青自己!
有拖拍, 嫁得出, 也未必是好事,
因為倘若你的男友或丈夫, 只像晏子的車夫一樣, 毫不上進, 卻驕傲自負,
那麼, 和他在一起, 只是有苦自己知而已!
更何況,
他的身高,
可能都無8尺!
自我增值 在 2021自我增值：10個必學工作技能增值自己 - Compass Offices 的相關結果
這些增加工作效率的電腦必學技能包括：更快速的打字方法、熟悉鍵盤快捷鍵的使用、更有條理地整理email 信件夾、熟悉Google Suite 或Microsoft 365 等大多 ... ... <看更多>