兩個半月以嚟，在公在私我分別去咗迪士尼同海洋公園兩次，親身感受到人流明顯少咗，但每個遊客都玩得盡興咗，樂園變返做香港人嘅樂園。抗爭活動令到大陸人減少，係咪會影響經濟呢？答案係一定會，旅遊業、酒店業、零售業首當其衝，痛苦就梗架喇，但香港經濟係咪就會一蹶不振呢？咁就要搞清楚前因後果先。
第一：未有示威活動之前林鄭都公開講過，受中美貿易戰影響，對香港經濟表示擔心，所以唔好一經濟差就賴晒返送中先。
第二，其實早喺6月之前，旅遊發展局數字都顯示，雖然大陸遊客嘅數目屢創新高，但人均消費就下降，尤其喺人民幣貶值之後更甚，但偏偏我哋招呼得最多嘅就係大陸客。相反，東南亞遊客或者高消費能力嘅歐美長途客就下跌。
換句說話講，我哋一路以嚟用好多資源，去服待一班cheap精，更因為呢班cheap精嘅肆虐，「趕走」一班高質素嘅客人，而呢個咁唔符合成本效益嘅策略，就算無抗爭活動，遲早都係會帶香港走入經濟低谷。
第三，根據旅發局啱啱出爐嘅數字顯示，7月份中國內地嘅訪港旅客比上年同期下跌，但有來自其他地方嘅遊客都錄得增長（包括日本、印尼、菲律賓、英國、荷蘭），證明世界咁大，大陸人以外，我哋仲可以同好多國家嘅遊客做生意。
之前靠大陸遊客谷出嚟嘅經濟泡沫，就好似毒品咁，令到成個香港嘅旅遊業、酒店業、零售業都high上癮，變得不思進取。藥房搵到錢喎，就開藥房啦；大陸人多喎，售貨員淨係招呼大陸人就算，本地人望都唔望多眼；貨品質素、服務表現唔使諗係咪要改善啦，反正我打開門就有生意。
沉淪毒癮嘅下場就係當無咗毒品，癮君子就會生不如死。而家太過依靠單一客源嘅惡果浮現，商家先後知後覺發現自己原來無競爭力。講真，如果一個品牌、一盤生意、一間商舖，無大陸客人就即刻無晒人幫襯，就算無反送中，佢根本都捱唔得耐。
香港要戒毒，就要攬炒，攬炒並不可怕，反而俾一個機會香港去restart。跌得痛，人先會識去進步去求生。香港經濟唔可以再只依靠大陸，要發掘多啲唔同國家嘅人客，唔好淨係做死大陸人生意。另外，本土消費亦都好重要，尤其係零售業、飲食業，多幫襯真香港人開嘅良心小店，自己香港自己救，香港人加油。
自己香港自己救 在 梁天琦：自己香港自己救，並不是一句口號！ - YouTube 的八卦
梁天琦：自己香港自己救，並不是一句口號！已經有義士為我地香港人坐監做政治犯梁天琦自己都隨時坐十年香港人係咪仲可以對自己嘅城市家園袖手旁觀令到 ... ... <看更多>