有日，一對年老夫婦帶住兩個小朋友嚟到診所。
婆婆吩咐兩個小朋友：「你哋坐好呀，唔好亂咁走呀，阿婆去登記呀」
公公同兩個小朋友乖乖坐低。
婆婆行埋嚟登記處：「早晨呀姑娘，我兩個孫想睇醫生呀」
我：「好呀，未睇過嘅係咪？你有冇帶佢哋嘅身分證明文件啊？」
婆婆：「有呀有呀，我女話影低咗喺電話度，你等等呀，我搵吓」
婆婆拎出電話，皺起眉頭，左篤右篤。
我：「不如俾我搵啊～呢啲電話真係好難用..」
婆婆：「好呀好呀，我學極都學唔識，睇都睇得唔係好清楚」
登記後，我：「登記好啦，你可以坐坐先，我同兩個小朋友度高磅重先啊」
我行去兩位小朋友度：「過嚟度高先啊～」
家姐同細佬手拖手一齊跟我走。
家姐度完高後，到細佬。細佬望望我唔郁。
我問細佬：「係咪有咩事呀？」
細佬：「醫生姐姐呀」
我蹲低同佢講：「我唔係醫生啊，做咩事呀？」
細佬：「公公都要睇醫生呀，醫生你可唔可以醫好公公呀？」
我望望坐喺櫈上嘅公公，問細佬：「公公有咩事呀？」
家姐搶答：「公公好蠢呀」
細佬點點頭。
我：「點蠢法呀？」
細佬：「公公連我哋兩個叫咩名都唔記得㗎，仲成日問婆婆係邊個」
我明白了。
細佬繼續講：「醫生姐姐，公公係咪唔會好返㗎啦？」
咁細個嘅，會明白呢個係一個唔會轉好嘅病嗎？會明白咩叫腦退化嗎？
我：「婆婆有冇同你哋講公公點解會咁呀？」
家姐：「冇呀」
我：「公公佢而家都係一個小朋友，不過你哋會越變越叻，但係公公就唔會，佢可能會好多嘢都唔記得，好多嘢都會唔識，要你哋教佢幫佢。你哋有冇玩過湊BB遊戲呀？」
家姐舉手：「我有！」，細佬擰擰頭。
我：「咁家姐知唔知湊BB要點㗎？」
家姐：「要餵佢食嘢，幫佢洗面！」
我：「係啦～而家公公咪係一個大BB囉！」
家姐同細佬望望公公。
家姐：「我識湊BB呀！」
我：「咁你就要好好照顧公公，去邊都拖住婆婆同公公好冇？」
細佬：「我都識㗎」
我：「大家一齊照顧啊～你哋食飯嗰陣就快啲食完自己個碗，要食飽先有力湊大BB㗎，知唔知呀？」
家姐：「我食好多飯㗎！」
我：「細佬呢？」
家姐：「佢成日扭計唔食飯要婆婆餵㗎！」
細佬：「我以後會自己食！食完仲會餵公公食！」
我：「咁就乖啦～你哋以後就幫婆婆一齊湊大BB啦喎～」
家姐同細佬堅定的點頭。度高磅重後，兩個一齊張開雙手跑向公公撲向公公：「BB係我㗎」
#照顧老人痴呆病患者 #一切還原歸零
腦退化 在 經常做「這件事」...加速腦退化... 醫師:認知功能受影響..... 的八卦
腦退化 症是多種腦部功能衰退疾病!如果高於實際年齡，會增加未來十年內心血管腦血管相關的風險。在預防與治療方面，大致上是針對可改變的危險因子來 ... ... <看更多>