《蘋果日報》十件事：
1. 《蘋果日報》創報之時，每日隨報送蘋果一個，連送幾日（應該係廣告界傳奇林振強獻計）。我記得朝早返學經過屋企樓下七仔，有條人龍排隊買報紙。明明蘋果只係一蚊一個，而一份報紙好似要幾蚊……
2. 好辛苦買咗一份，上堂打開報紙睇，嘩，啲相嘅顏色鮮艷到不得了，仲要唔甩色—要知道當時其他報紙，啲油墨好似爛屎咁、一掂就成手都係（唔好問我有冇掂過爛屎）；惟獨《蘋果日報》，睇晒成份隻手只係有些少污糟。你試下當年拎份方向報，一嘢拍埋學校件白色恤衫度，成個《方向日報》個報頭會印撚咗上去。
3. 《蘋果日報》 A疊永遠係港聞+國際、B疊係財經、C疊係娛樂、D/E疊係名采+中間係肥龍骨精強、仲有一疊係馬經(好似係)，呢種有規律、又簡單易明嘅排版真係好方便。一家人拎住，港聞畀阿媽、自己拎娛樂、老竇睇風月版，當年冇互聯網，報紙係香港人少數能接觸到外國娛樂新聞嘅渠道之一，有好幾次為咗睇日本娛樂新聞（好似同木村拓哉／竹野內豐有關）而同家姐大打出手。為份報紙、為啲死人日本仔，何苦呢？曾幾何時，好景買日本動作片嘅舖頭，最好賣嘅碟永遠係《蘋果日報》介紹過。
4. 高中幾年，每日都買一份《蘋果日報》帶返學。男同學一嘢就潛咗副刊中間份買碟指南、賭馬嘅就拎走份馬經。創報開始，我睇《蘋果日報》只會由C疊娛樂版開始睇，到咗2020年今年睇網上版都係由娛樂版開始，沒有改變。港聞有死人榻樓，都睇咗娛樂先。冇《蘋果日報》嘅香港令人震驚、冇娛樂版嘅《蘋果日報》令人絕望。
5. 《蘋果日報》最印象深刻嘅頭版，唔係張國榮愚人節輕生、唔係沙士、唔係金融海嘯，乜鳩都唔係，而係1996年嘉利大廈大火時，某日頭版嗰張影住火場內一個活生生被燃燒中火人嘅相，亦即係配圖呢張（圖源：http://cyberxfiles.com/cyberx/cx_view_xfilepage.php?id=632）。同班女同學住喺嘉利大廈斜對面，佢望到蘋果個頭版，面容即刻扭曲、眼淚如雨下，佢話：
「原來來尋日放學後，望向火場見到嘅，真係一個活生生嘅人。」
女同學嗰日喊足三堂，之後缺席咗好幾日。嗰日份《蘋果日報》，未睇就成份掉咗去廁所，但嗰張頭版，一直印喺我腦海中，無法揮去。
若干年後，睇到《拾香紀》，結局係女主角經過嘉利大廈後身亡，頓時又諗起呢張頭版......
6. 又，後嚟投身火海，身邊有唔少朋友先後喺《蘋果日報》做記者，港聞、財經、副刊、國際、體育、ＩＴ，可惜就係冇朋友做風月版。朋友搭朋友，我識嘅蘋果黑記（哈哈哈哈）數數埋埋應該有十幾廿個吧......班友自己讚鳩自己，話《蘋果日報》乃新聞界少林寺，係人都想入去練一練（大概咁上下），我以前諗過做記者，當然有諗過入蘋果做。不過，入到去，大概最終畀人裁一裁，你知，肥佬黎痴撚線嘅。最搞笑係：每個月每組都要炒人，但其他組可能又會請人，於是乎你可能呢頭畀Ａ組炒咗、Ｂ組又會請返你。我一直有興趣去鋤報會（尤其壹周刊），成日想當住楊懷康面叫佢同張五常嘅專欄收皮，不過到壹仔當年賣盤又賣唔成、變成walking dead 我都未有機會去過。更搞笑係我仲而訂網上版壹仔（同蘋果分開），但從嚟冇登入過😂😂😂
7. 《蘋果日報》最傳世嘅一篇文章，應該係陶傑嘅《大學四年制》，亦即是 “Come on James”嗰篇潮文。我記得嗰個星期一返到公司、咬住聖安娜麵包，翻到副刊睇到黃金冒險號呢篇文。故事傳神、題材應景（當年開始討論同落實３３４學制），加上自己知道港大出產港女不計其數，篇文可謂驚為天人、一口氣睇咗三四次。後嚟被高登仔改作潮文、成為經典，又被改編成《羅生門》二次創作作品，《大學四年制》肯定係蘋果日報同陶傑嘅傳世不二之選。
8. 幸運地上過一次《蘋果日報》頭版，居然不是因為醜聞（所以才說是幸運），而是與友人 Leo To合作嘅無聊app 「求偶大作戰」。講起嚟有啲利益衝突，因為負責頭版嘅記者，本身係識嘅。嗰年係2013年，未有831、佔中未出現（其實到咗今日2020年仍未有戴教授口中嘅佔領中環，我就快喺法治復活之前報海關拉鳩佢）、距離612 721 831 101 仲有足足六年，而家回望，咁嘅垃圾題材都做到頭版，感覺「和平真好，屌你老母」。
9. 《蘋果日報》去年開始收費，二話不說便訂閱。《蘋果日報》好似 Netflix – 你未必日日睇、未必全部嘢啱睇（好撚憎黎智英同班傳統泛民喺度阻住地球轉），但你想睇嘅時候好怕冇得睇，《蘋果日報》可以做得更好，其他報紙做得好都只係嘥鳩氣。你可以想像連《蘋果日報》都冇埋？屌你要睇咩方向報同岳不羣報，我不如直接睇文匯大公？
10. 最後，寫呢篇《蘋果日報》十件事，係純粹有蘋果記者唔知頭唔知路，居然叫我宣傳下：
『蘋果1-click app內訂閱！
訂閱蘋果，10秒搞掂！
蘋果1-click即訂！
喺蘋果app度，撳「我要訂閱」！』
而我又唔好意思推佢（雖然我同佢完全唔熟／我有更熟嘅蘋果記者朋友），所以無可奈何寫咗千鳩幾字，仲要冇錢收。
其實，有畀錢睇開《蘋果日報》嘅人都知，蘋果個app何止1-click subscribe，有時候0-click 0秒 logout，睇睇下又叫你再登入再畀錢，神奇頂級超卓，一日到黑叫你課金，同《黑社會２》阿武哥成日叫「加錢」一樣咁痴撚線。
《蘋果日報》個web 版面同app好似同netscape / ICQ 咁，一樣係上世紀發明，絕對 0% user friendly。
政治打壓、同業競爭唔會令我唔睇《蘋果日報》，但佢嗰個垃圾到頂點嘅ＩＴ系統，的確做到了。
不過（一講呢句即係上面全部係垃圾），都係嗰句，《蘋果日報》可以做得更好，其他報紙做得好都只係嘥鳩氣。
如果搵楊大狀寫薦蘋果日報，唔知可唔可以link埋over dead body，究竟一個人可以死幾多次？
最後，未訂《蘋果日報》啲撚樣啊！快啲同我訂！！課金同畀錢啊！
最後，未訂《蘋果日報》啲撚樣啊！快啲同我訂！！課金同畀錢啊！
最後，未訂《蘋果日報》啲撚樣啊！快啲同我訂！！課金同畀錢啊！
https://hk.appledaily.com/…/202…/YR3EBVHY6PHZVBRZV3NARD572A/
＿＿＿＿
（所有記者朋友，以後唔好再搵我免費寫嘢，OK，否則寫到你肯撚定悔不當初啊～～！！而我本身不缺錢，所以畀錢我都唔會寫。）
肥b黑社會 在 條肥仔有乜咁勁？Marvel世界最強黑社會kingpin角色介紹 的八卦
一齊來認識心狠手辣，虎背熊腰，最強地下之王kingpin。大家有咩角色想我介紹嘅可以喺下面留言，同大家做個角色介紹嘅點唱。 ... <看更多>