《牛定熊？》
找數時間一：同大家分享下我覺得依家到底係牛市定熊市。雖然有好多人都話，今時今日，全球低息加資金氾濫，其實牛熊市之論已經不合時宜，但我都希望為一個明確既升市畫一條分界線：就正如我响剛過去個星期一响自己fb live入面所提過，係26500點，亦即係50月線。呢一條線，係2018年貿易戰以來不斷去測試都收穩得，2020年肺炎就即刻下破，到依家第五個月。今個禮拜初一度試到，但係依家都收唔到。而要達標既條件係今個月最後尾一個交易日收到。
點數講完喇，我既分析當然唔會咁膚淺，我仲要講下點解依家每日既成交會咁大？點解新經濟包括科技同醫療股可以日日爆一成過外，賺錢仲易過食生菜？第一，資金多左，如果話係黎自量寬我同意。但係量寬已經一段時間，點解依家先黎？我就當：一、之前外資擔心緊國安法，依家無咁驚；二、我6月初出既圖所講，資金覺得相較起依家既美股黎講，港股算係平，有得追落後。至於有無係因為內地資金衝落黎維穩，抑或外資黎過終極一升之後先撤資？我唔想鳩估。
第二、點解依家個市好似好易賺錢，幾乎你合埋眼求其隊落隻新經濟股度都升鑊金既，求其抽隻新股又賺到想喊出黎，有人仲話依家係全民皆股添！但個問題係：呢種情況既出現，竟然係响26000點？距離以往牛市既頂位仲差好遠，咁係咪即係依家仲有排未爆破？呢點我有保留：一、好多人都開始意識到，指數之所以唔跟，係因為指數入面根本無科技股，得隻騰訊（700），所以科技股升，指數無受惠。呢個係岩既，所以我一直都話，應該將更多既新經濟股加入去。
二、正正係因為咁，我想鄭重提醒大家：千祈千祈唔好再用恆指既點數或者市盈率黎判斷個市到底係咪超買或者癲過龍！唔好因為個市有排未到頂而蒙蔽左你對個別股份係咪仲係值得追既獨立判斷！一句講曬：其實依家港股同美股一樣，舊經濟股同指數俾疫情拖住後腿根本都升唔上；但係科技FAANG等等，或者係香港果渣，就得到熱錢既不斷追捧。但個問題係：overvalued得好緊要，RSI已經嚴重背馳！
因為咁，我地眼前隨時會出現兩個好壞既情況：首先，講個無咁壞既先，就係响不久既將來，科網既泡沫會爆裂，响高位追入左相關股份既人會輸好多，但係個指數唔會點跌，因為個指數根本無呢類股。第二，亦即係更壞既情況，就係個科網既泡沫未爆住，同時，指數不斷咁加入新經濟股。到呢類股佔指數有一定比重既時候先爆既話，苦況會更加堪虞！
總結：唔好因為指數未牛市而忽視左新經濟股已經有泡沫！
#指數未牛 #股已泡沫
