【目標3日已到達】
士佳：有追開本欄的都應知道，我今次睇的首目標在312XX-315XX，如無意外，應該今日安全到達。
雖然我對學生的責任大些，會講得詳細一點，但都無忽略讀者聽眾們，上周四已同大家講睇好，要買了，但通常今日收到的回應係未買或者買得少，今日先買遲唔遲。
我通常都會暈低，唔識答，因為這些問題答唔完，你話唔怕買，大市明後日又真係升多D，明後日一樣有讀者問：「呢刻先買遲唔遲？」其實，我上周四在「e線」已講得斬釘截鐵，特意鄭重講「中期底已見」，咁你都唔買？就係個心十五十六，如果無conviction，就無論做好做淡，都係「輸的多」，震一震就出局，我點答都無用，所以我唔識答，我姑且將我點睇大市的來龍去脈寫一寫，你自己決定點做好了。
學生應該比較清楚，過去兩個月，我維持自己的持貨量20％水平，與2017連槓桿200%至300%的完全兩樣，皆因未看透大市，只係叫大家當上落市看，日升就夜跌，夜跌就日升，Pattern是看中了，但上落市唔知幾時完，幾時會突破，通常注碼都會縮細，我就縮得最細，志在參與，因為唔參與，無了盤感，感受不了幾時會突破，而事實上大市亦無重心，學生見我炒的都是細價股，什麼彌明，什麼賓士，什麼眼科，充其量大D都係甘蝶啊，Sky能咁樣，通通都係見升有勢炒一炒，謝絕長揸，長揸的寥寥可數，七小福走失洪金寶、告別肥彭之年等，因為四、五隻優質大股，相繼回落，對市況未有信心。
不諱言，我在5月7日上周一近低點的位置，仲做過沽，講明係5%，其中原因對再上星期四五的中美談判預左失望，這些跌，可以跌很多，所以賊佬試砂煲咁做5％衍生工具淡倉，個股仍持有15至20％好倉，我仲講明如果跟著有機會大手做好。
理由無他，呢D大是大非的日子（美國叫中國2025收檔），只有大跌大升，「英國脫歐」「侵侵當選」大家應該領教過，亦睇到我的操作，今次都係咁，到周三四，學生知道我已大力十倍做好了。當個市在29800氣氛咁差，我都有淡倉，咁居然炒兩枝陽燭上來，喂，人地真金白銀買架，要在大家都淡淡地既時候做好，需要無比的信心，呢個信心唔會來自我們的散戶朋友，既然大戶要做好，還要挑看似最壞時做好，見了底的機會係好高，所以我由-5%變做100％睇好。
我的第一目標係312xx，點樣來？有幾種計法，其中一種，睇番過去兩個月，每逢跌到見支持都係回升1,700至2,000點（見附圖，即係好友子彈係得咁多）咁今次29580起計，即312XX至315XX左右。
我自己睇，唔止升咁多，但點解312XX-315XX都會落D車，大家不要只睇方向，更要睇注碼，今次買得2018年來最大，到首二目標梗係落D車，多少大家自己諗了。今次升市懷疑同預炒MSCI有關，懷疑同小米有關，咁明天就係第一關，六月就係最後一關，今次美中不足，是低位沒大跌殺好倉，所以升中會跌是必然，因為這種升市，通常唔會直升，讀者又會話「而家追遲唔遲」，追得兩追，個市就回，遲入的又無conviction，就會被震走，所以個市就好像遇到阻力，走完又上過，又有「而家先追遲唔遲」的出現，如此類推，zigzag 上升，直到遇見真正阻力，如重注或心血少，遇到zigzag會斬完追，追完斬，所以最好做係低位揸左，仲要揸到唔駛再搵位加注的注碼，312XX至315XX減D，最後走曬。
真係要大升要靠大戶的決心才可炒上去，我覺得無謂估，邊坐邊食，係呢D「唔牛唔熊」市的皇道。
挾硬要我估最後彈到幾多，我覺得在319XX以上，咁會唔會真升上34000，一掃頹風，唉！知咁多做咩呢，話明比你聽，你都坐唔定，坐唔到的了，賺第一浸算，唔好諗咁多。至於想中間搵位加注的朋友嗎？唉！咁容易睇的見底回升都睇唔到，你仲想係升中帶跌咁高難度入市？要慢慢學，唔係睇FB睇雜誌睇報紙咁簡單的。
Sky Sir 執筆
