想盡量撇走晒一切情緒，正正經經寫段字。
嚟到呢啲討論，一定有人會話唔去嗰啲地方就冇事、去就自己攞嚟、然後再拗邊個唔啱在先......等於有雞先定蛋先嘅爭論，永遠冇答案。
但係而家個問題嘅核心，又或者唔少人嘅心結係：普通人嘅暴力可以畀公權力拉，而公權力一方用咗過度武力 - 又或者「懷疑」用咗過度武力，就幾乎冇得追究。
公權力擁有嘅武力/權力，前題係要喺法律制約之下行使。如果冇制約，呢種合法嘅武力同權力就有機會變得危險；因為，可以盡情使用，而又唔需要顧慮後果。
簡單一句，成立獨立調查委員會，係一個方法。
邊個要處理呢件事，答案其實人人都知。喺一個咁混亂嘅時期，行政長官今日出席嘅活動係青少年軍事夏令營結業禮；然後，半隻字冇提過點解決。
