今日杜汶澤大戰陳百祥三百回合，其中講到藝人表態同白色恐怖問題，乜都唔知唔識唔信同睇唔到嘅荷蘭叻，竟然唔知有香港藝人被大陸封殺！
睇吓新聞啦荷蘭叻，最新被封殺嘅主角係：嗯… 容祖兒。祖兒星期六貼咗張素顏自拍照，戴住口罩，頭髮輕蓋右眼，身穿藍黑色衫，caption 寫住：「只知要飛」，即係佢首《空港》嘅第一句歌詞，睇嚟佢要搭飛機出發啵！
不過一張自拍，居然引起大批大陸網民抵制，指祖兒係港獨，罪名包括：遮眼、口罩、黑衫、「和你飛」同「只知要free」，湖南衛視更將祖兒除去「雙十一晚會」表演歌手名單…… 吓？？
今日祖兒貼文回應，向受影響各方致歉：「從沒想到隨性而發的，一句歌詞，一張自拍，竟然會引來這次風波，對此我為自己的粗心大意感到十分抱歉！亦感到難過自責，讓家人同事朋友和愛我的人擔心了。」祖兒之後交代當日個 post 嘅始末：「當日的帖文只是想表達即將起飛去工作的興奮，非常純粹地和大家分享近況，實屬無心之失，作為公眾人物，沒有想到自己的言論舉動會造成這麼嚴重的影響，的確是我疏忽大意。」
祖兒最後表達愛國愛港之情：「我熱愛祖國，熱愛香港，從不支持港獨，我也一樣毫無疑問地熱愛和平，希望一切盡快恢復平靜。我希望用實際行動去證明自己，繼續分享正能量的音樂和感悟。亦對受事件影響的各方再次深深說一次對不起。」更有網友發現祖兒 IG unfollow 何韻詩，事緣出聲明後，祖兒比大陸網民發現 like 過何韻詩嘅 post。
記得之前陳奕迅出張遮眼相都比人鬧，佢就無做任何回應，理得人點講。祖兒今次為無犯過嘅錯而跪低，令唔少粉絲失望，暫時嚟睇，大陸唔係好領情，繼續比人鬧，香港呢邊又比人鬧，一篇兩面都不討好嘅聲明，越描越黑，唉……
#其實老實講 #有心理準備佢會出事
#但真係估唔到係因為呢張相 #暈喇
