今天, 放假, 陪媽媽飲茶.
循例的陪媽媽日.
邊飲茶邊盤算, 稍後應帶媽媽往何處遊玩.
這時, 電視播出吸濕大笨象廣告, 於是同媽媽講:
'呀媽, 外國有隻大笨象, 因太凍爭D死, 後來D人餵佢飲伏特加酒先保到條命咋!'
呀媽係咁笑, 頻說D動物好可愛, 問隻象有無醉, 又話麗園執左, 以前有大笨象食蕉, 我又問點解唔食辣椒, 佢話象怕辣, 我話東南亞人食得辣, 東南亞象無理由唔嗜辣......
東拉西扯, 母子樂也融融.
我想想, 既然媽媽喜歡動物, 不如便載媽媽到濕地公園看看吧.
從九龍灣到天水圍, 一東一西.
每次與媽媽同車, 我都怕媽媽暈車浪, 因此永遠把車開得甚慢.
同時邊揸車, 邊和媽媽談話, 令她分散注意力.
一小時的路程, 我倆雞啄唔斷.
上至表妹快結婚做幾多人情, 下至屋企換燈泡也談到.
'呀媽, 你搵邊個幫你換燈膽架?'
'隔離屋個男人囉, 佢幾好架.'
'咁你有無多謝佢呀?'
'有呀, 我後來封左封利是諗住俾佢, 但啱啱個男人番左工, 所以俾佢老婆!'
'咁咪好囉, 費時拎人便宜啦'
'但佢先生返黎後, 按我門鐘, 我一開門咋, 佢就係鐵閘條門罅丟返封利是入黎啦!'
我建議呀媽下次買袋橙俾佢, 斷估佢唔可以係門罅中丟橙......
但媽媽說, 要過兩日才再將行動升級, 因這兩天忙著包舊燈泡.
我問為什麼, 她說:
'我要用多D舊紙包好D燈膽, 因為係玻璃, 我見到有D老人家會係垃圾桶執野食, 我唔想佢地界親......'
不知怎的, 我有些哽咽, 我覺得媽媽比很多人想得更多.
一小時後, 終於到達濕地公園門口.
管理員走出來, 我正想問有沒有泊車的, 他竟然說:
'今天休館, 這裡逢星期二是例假!'
SHIT~ 山長水遠來到而不得入, 只怪自己沒有來前做點功課!
其實, 我除心靈受創外, 仲......好急尿!
我對媽媽說:
'D動物偷懶, 今日放假呀!'
媽媽倒沒有失望, 頻說讓動物放假吧, 我倆回家去吧.
其實, 對她來說, 和兒子一起談了一整個下午, 便已經是這日的主菜了.
但是, 對我來說, 我和媽媽出來, 便不能空手而回.
所謂空手, 不是買東西, 而是一個可供回味的目的地, 一次經歷.
一次出街, 一個地方, 一次回憶.
這是我的宗旨, 即使失禁, 也要堅持!
我最後, 載了媽媽,
到屯門黃金海岸------
看日落!
媽媽, 第一次踏沙.
媽媽, 第一次聽浪.
'原來企喺沙上係企唔穩架喎!' 媽媽天真地說.
有幾次, 媽站不穩, 捉緊我的臂膀.
便是這樣, 兩母子並肩站在沙灘上, 看著太陽緩緩落下.
媽媽, 這一生人, 第一次在海邊看日落!
'看, 呀媽, 個太陽好似鴻星酒樓雙黃蓮蓉月個咸蛋黃呀!'
媽媽目不轉睛地注視著夕陽, 不欲錯過哪怕一刻.
我口說著, 心卻很緊.
怨自己為何讓媽媽等到七十多歲, 才第一次看到海邊落日.
所有人, 都曾帶自己心儀的對象, 到不同的地方去.
年輕時, 費盡心思, 買小禮物, 氹女仔開心.
青年時, 刻苦經營, 為對方攪浪漫生日派對.
長大後, 死慳死抵, 帶她到外地旅行, 看日出, 觀日落.
中年時, 難抵糾纏, 拖著子女的手到處遊樂, 寓教於樂.
但, 我們年老的父母呢?
子女會出聲, 會抱怨,, 我們的父母卻永遠默默被丟在一旁.
我們能夠愛幼，但我們卻時常忘了像愛幼一樣尊老。
為人兒女者，當你緊緊握住你的兒女的小手時，
也別忘了，父母的老手,
可能更盼望著我們去牽！
暈車浪 在 【暈車暈船】耳鼻喉醫生詳解暈浪原因 - YouTube 的八卦
搭車搭船最怕暈浪！據#耳鼻喉科專科醫生#賴廣麟所講，原來暈浪同耳仔有好大關係，到底點解呢？ 醫生仲會教大家簡單解決暈浪嘅方法～#信健康# 暈車浪 # ... ... <看更多>