開始懷疑人生
早幾日阿媽如常半夜三更，好似唔係好記得係最忙嘅時候打比我，好鄭重咁話忽然諗起有啲特別緊要嘅嘢同我講。
「依家你上網啲嘢（應該係話Facebook之類）搞到咁，如果有一日我唔响度，你唔好返黎呀，博唔過㗎！有心就得喇，我明㗎！」
我嘅即時反應就係咪癡線聽埋啲親戚亂噏，然後花咗一輪時間安撫先可以收線。到咗呢個星期，屋企個「西妹」Term Break放假，因為驚之後再lockdown再困住响屋企，所以希望盡量安排啲節目比佢，老實講無論有無疫情，呢啲都係一般正常英國家長會做嘅事黎嘅。可惜佢老豆偏偏每日最早都朝早六點先收工瞓覺，不過總唔能夠要佢等到兩三點先出門口（去到乜都閂晒天黑啦），結果呢個星期每日就瞓嘅時間最多得四個鐘。
對好多人黎講，分享呢啲個人嘅嘢，緊係覺得係博同情。無錯㗎，好多人想做到嘅嘢，就黎成功㗎喇，因為今天我收到通知，本Page有好多投訴「不足」。所以係時候準備香檳喇，當有一日大家忽然間唔見咗呢個垃圾Page，唔洗問點解㗎喇。
本來都有啲嬲，亦有啲唔忿氣，當大家尋日贊揚Ted Cruz如何KO Jack Dorsey，討論美國邊個邊個點樣壓迫、審查同限制同自己意見不同聲音嘅同時，點解自己响同路上遇上同一類投訴呢？
不過諗返轉頭，都係自己嘅錯。
講移民英國，講到有咁易得咁易，英國係人間仙境一樣，然後移咗民就藥到病除咩問題都解決晒，點解要講咁多人地唔啱聽嘅嘢呢？講下飲飲食食、國內玩樂、邊間超市平，那裡有減價，親子「必到」境點咪好囉。
人走咗唔應該提香港，如果講嘅話就應該說明自己做過乜、幫過邊個、做過啲咩，更錯嘅係無樣無名無頭無面，就唔好僭越別人嘅話語權，令人唔高興又何必呢？
分享國際新聞就應該字正腔圓不多不少咁轉述就算，唔好咁多聲氣，就算要討論，應該要跟足「市場」風向，人地鐘意鐘意聽乜就講乜，迎合大部份人口味，做乜要將所謂嘅外國傳媒視覺強加响香港人身上呢？
好啦，結果藍嘅、黃嘅、移民嘅、留低嘅任何一面都唔討好，換來嘅只係剩低四面受敵（又唔能夠八面威風喎），人唔似人，鬼就經常比人話係鬼，為咗咩？
曾經有個朋友苦口婆心咁勸過我：「希望啲人會思考多啲？咪咁天真啦，做咗咁多年香港人，班友邊有得救㗎！剩係鐘意打飛機圍爐，班友抵幫咩？無人會多謝你㗎，因為你講嘢唔啱聽呀，知唔知？到頭來只會屌你一個！」
當時係我偏唔信，因為哪怕一萬個有一個都係好事，總有一日會有人明，睇黎應該係高估咗自己（好多好多....）！
P.S. 唔該唔好再多謝我，因為我乜都無做過，就算有做都得唔好。另外，再講多一次，我唔係KOL，永遠都唔係，因為呢個名稱只會令人盲從（分析如是、購物如是、就算產品推介亦都一樣）。不過無論點，我只係懷疑人生，但唔代表放棄，唔係因為有希望，只因本人天生賤格。
P.P.S. 未知下一步，未諗，諗到話比大家知...
#大家令我明白我從來不是同路人
#是異類甚至異形
