鼻塞有靈（下）
上集：http://bit.do/fqNPW
我將我嘅經歷講晒出嚟，阿聰半信半疑咁問：「鼻塞都可以轉移？」
我點點頭，指住旁邊嘅一張長椅：「你只要負責瞓喺度，心諗：『我接受鼻塞靈』就得。」
阿聰猶猶豫豫咁瞓低咗，我撲埋去，用我嘅鼻孔對準佢嘅鼻孔，用力一擤。
呢個時候，我鼻端嘅觸感突然唔同咗，我坐起身一睇，見到阿聰用一張紙巾接住咗我嘅鼻涕。
阿聰好嚴肅咁講：「我左思右想，認為『鼻塞可以轉移』並唔合理，哪怕係傳染病，都唔會因為傳染畀人而令自己康復......」
阿聰講得頭頭是道，其實佢只係想掩飾，掩飾佢唔願意為我犧牲。
我好失望咁走咗，當晚，我再次夢見鼻塞靈。
佢好囂張咁講：「你唔好諗住陰我，搵張紙巾就想趕走我。我會確定對面係其他人嘅鼻孔，先會順住你嘅鼻涕滑落去。」
「我唔係陰你，我都估唔到，原來阿聰對我唔係真心嘅。」我長嘆一口氣。
第二日，我就去搵朗朗，再講一次事情嘅經過。
朗朗好爽快咁瞓低，拍晒心口話佢作為男人，會保護自己鍾意嘅女人。
然後，朗朗「接受」咗我嘅鼻涕，過程有啲核突，但自此之後，我唔再鼻塞，亦無再夢見鼻塞靈。
我好感動，同朗朗一齊咗，後來就結咗婚。
幾年來，朗朗都深受鼻塞困擾。
每晚，我總係見到佢張大嘴，努力用嘴呼吸，有時仲會輾轉反側，好耐都瞓唔著。
但朗朗總係叫我唔駛擔心，話好小事啫，佢可以幫我承受痛苦，心甘情願。
易求無價寶，難得有情郎，大概就係呢個意思。
我都唔捨得朗朗咁辛苦，我搵咗好多方法，希望醫好佢嘅鼻塞。
但情況就同我當年一樣，藥石無靈，朗朗都叫我唔好試啦，就算鼻塞一世，都唔致命嘅。
直到有一日，我聽講市面上新出咗一隻新藥，可以醫好最頑強嘅鼻塞。
隻新藥屢獲好評，我都買咗畀朗朗，死馬當作活馬醫。
估唔到，朗朗嘅鼻塞真係醫好咗。
我又驚又喜，同時又有少少擔心，呢隻藥咁勁，會唔會有咩副作用？
於是我開始搜索呢隻藥嘅資料，發現研發人係.....阿聰。
自從同咗朗朗一齊之後，我就無再同阿聰聯絡，根本唔知佢去咗研發鼻塞藥。
我搵咗幾個阿聰嘅訪問，記者讚阿聰隻藥有效，循例問阿聰點解會想研發呢隻藥。
阿聰悠悠望向遠方：「我曾經鍾意過一個女仔，佢深受鼻塞困擾，我就想研發一隻藥去幫佢。」
記者追問：「結果呢？呢隻藥幫唔幫到佢啊？佢係咪好感動？」
阿聰微笑，搖頭：「研發一隻藥要好長時間㗎，佢早就結咗婚，我哋無再聯絡。不過，我相信，如果佢仲鼻塞緊，呢隻藥都一定幫到佢。」
我呆若木雞。
我諗番起，當年我想將鼻塞靈轉移畀阿聰，阿聰唔信，我就覺得佢一定唔係真心。
但係真心，係咪一定要對方有損失？
朗朗嘅真心，解決咗我嘅鼻塞；阿聰嘅真心，幫助咗千千萬萬鼻塞嘅人。
就算係咁，我諗番起朗朗接收鼻塞靈、夜夜受鼻塞困擾嘅場面，我依然好感動。
不過，我仲有一個問題。
老公一向自詡為最愛我嘅人，呢件事我應唔應該話畀佢知？會唔會打擊到佢愛我嘅自信？
人鍾意見證犧牲，犧牲代表真心。
就好似你想食肉，割自己舊肉畀你食嘅人，一定真心過為你買豬肉嘅人。
但最有效嘅解決方法，未必係犧牲得最多嘅方法。
正如你千辛萬苦割出嚟嘅肉，唔一定好食過豬肉。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #鼻塞有靈
