（我不是黃絲，好似係除非唔係）
—
首先感謝壹週刊有留意到我寫左篇有關《今晚打喪屍》嘅觀後分享，亦引嚟部份網友有我將電影專頁政治化嘅憂慮。喺度姑且再講多兩句，以正視聽。
—
一個人只有一個世界，而透過閱讀，就可以由一個世界進入無盡嘅「他」世界，而電影就係我嘅閱讀方式。電影之於我，最致命嘅吸引力就係作為「第八藝術」，就係作為人類以往一切視聽經驗載體嘅總和，每次睇完一部戲，我都覺得好似番左一日學咁，不斷吸收人地嘅想像同創意，不斷學習。
—
而睇戲愈多，純粹電影嘅內容或者其他人嘅解讀已經滿足唔到我，所以就有「成一家之言」嘅做法，即係上網開POST發下嗡瘋，自娛也好，有人睇也好，有D野不吐不快。如題目所講，「借題發揮」其實就係一定嘅，亦絕對準確。每個人嘅經歷、性格同價值觀都唔同，所以睇同一套作品就會有唔同嘅睇法，而講嘅野亦唔應該係一式一樣，或者好相似，否則讀者洗乜要睇你寫嘅野？
—
但係，我就絕對唔認同「黃絲帶」嘅稱謂。縱使可能呢度有唔少讀者都係自稱為「黃絲帶」，或者覺得我都係「黃絲帶」而睇我寫野都好，冒住定位失焦嘅風險，我都絕對唔會話自己係「黃絲帶」。原因就係，當每個人都係獨一無二嘅時候，點解要用顏色去區分每一個理應係獨立嘅人呢？
—
你係藍，我係黃，所以我唔GUR你，所以我唔同你溝通交流，因為「此仇不共戴天」。但就算係咩顏色都好，究竟有無可能有個明確無誤嘅定義呢？有無可能我會同意某部份嘅「藍」，但又會有某部份「黃」嘅價值觀？如果你係「混色」，如果你比唔到個100%嘅定義，咁就不如放棄呢一種對立嘅思維，因為你會犧牲嘅係好多互相了解同協調嘅機會。
—
所以我絕對唔係黃絲帶，亦唔係藍絲帶，根本唔應該有任何野定義到你自己（就篇文嚟講，你話我係「本土派」都無咁嬲）。其實好多事實就比分黨分派分顏色所蒙蔽，就好似在《拆彈專家》同《春嬌救志明》影評入面，我係支持合拍片的，咁我又係咪變左政權嘅爪牙？
—
又或者係《原諒他77次》入面，我都寫左自己嘅一D愛情經歷同對維繫戀人關係嘅睇法，咁我係咪又將「電影專頁愛情化」？政治、愛情、夢想、工作、家人，呢D題材我都相對多寫，因為呢D野係構成我地生命嘅重要部份，只係這次《今晚打喪屍》我就寫左我對香港政治未來嘅願景。
—
而我只會自願比一樣野去定義自己，我係一個香港人。
—
壹週刊
今晚打喪屍
我係本土派 在 【錄音流出】 鄭松泰：「大眾係白癡，當我哋係本土派！」 的八卦
【錄音流出】 鄭松泰：「大眾係白癡，當我哋係本土派！」 ... <看更多>