有種幸福叫「夜粥」
半夜三更返到屋企，見到枱面擺咗菜乾豬骨粥，涼伴麻醬窩筍鮑魚絲，油炸鬼，至愛嘅沙朥越胡椒粉，人間美味，無過於此。無論日頭做嘢幾咁艱難，嘆完碗靚粥，仲點會記得艱唔艱難，正所謂「識得知足，夜晚食過粥，就知道乜嘢叫幸福」。
做人只要天生符碌，好鬼易滿足。
做人只要生活簡單，有粥就食粥，唔使食龍肉。
做人只要慾望低下，就唔會咁易畀名利物質控制。
做人只要有個好老婆，你心中有佢，佢心中又有你，仲識得煲粥，又願意一齊食粥，肯定好幸福。
咁顯淺嘅做人道理，我細細個就已經明白。
問題係，蠢人就算食咗龍肉，金銀又滿屋，想一得二，得咗二，攞埋三四五六七，仍然唔滿足，甘心接受無窮無盡嘅心理壓力，卑躬屈膝，脫髪禿頭，大肚腩，胃痛，失眠，家庭唔和睦，事業之外，一無所有，窮得只剩下錢，又點會幸福，當然都唔會理人幸福定唔幸福，做人做到咁，你話幾可憐。
好彩嘅係，我做人夠符碌，生活要求十年如一日，慾望低下，無人可以控制我，仲要「嫁」咗個好老婆，結婚廿七年，食足大人整嘅宵夜廿七年，不知幾幸福。千祈唔好以為我囇幸福，而係想提提大家，一分知足，十分幸福，十分知足，就會明白有種幸福叫「夜粥」。
後記：
寫於五年半前，呢番顯淺道理，細個明白，大個亦明白，今日更明白，網友明唔明白？
後後記：
人人總有一死，生不帶來，死不帶去，有錢有權有地位係咪唔使死？唔明白就唔明白。
