《有關弊傢伙我女朋友有咗出書事宜更新》
首先要講聲對唔住，書要延至24號先可以寄出，而自取書本將要延28號。
第一次自己出書，睇少咗排版同埋校對工作時間，因為書入面有部份廣東話同書面語詞語需要統一返，改正量比較大，而校對編輯都需要更長時間去做，書本係上星期日先真正完成可以付印。
其次上月開始預售到截至上星期為止，預購數不足二百本，印刷方面其實需要印一千先會符合成本效益，當然二百本連印刷成本都未足以回本，好彩係排版設計同校對都係以友情價極低價錢幫我手，所以只係需要回到印刷成本就得。
有朋友都勸我，搞完一大輪分分鐘仲要貼返錢同時間去賣，不如直接退款當無事發生，好過呢個時勢仲要冒住一個蝕本風險去做。
我都好掙扎，始終預售通知咗大家，要令大家失望真係我最最最唔想見到嘅事，所以星期二我終於下咗決心點都印，俾一個交代大家，亦好感謝其他作者同我分享經驗，慢慢就會賣到，唔好急，一定唔會蝕嘅。
遲咗通知大家，係因為我想真正確認印刷出到嘅時間，唔想個期再有任何延遲，到尋日付印之時，我先安心可以同大家交代返個時間……
我相信有讀者訂咗書，遲咗會有不滿，我係度再次同受影響讀者道歉，如果有讀者想退款，我將會全數退回，亦會同每位訂書的朋友個別交代事件同埋安排有需要嘅退款。
呢次完全係我對於出版工作量輕視而成嘅結果，原來一本書係有咁多後期要修正，同埋好多地方睇一次兩次三次都係未完全改正好，而每次我改正，係要將差唔多10萬字內文重新睇一次，仲係要好仔細好仔細咁睇先得……前後我睇咗四次……睇到我自己都驚咗……
點都係，呢個係我責任，如果有讀者想退款，我完全理解，亦致上最深既抱歉，對唔住。
－－－－－－－－－－－－－－－－－－－－－－
如果有其他朋友想買書的話，都歡迎點擊下方連結下單。
《弊傢伙，我女朋友有咗》試讀：https://www.facebook.com/Maydreaming/photos/a.278579888904333/1115173785244935/?type=3&theater
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：
https://maydreaming.boutir.com/i/WDnmnPAAA
