【技術分享】短傳
短傳，係一個由細開始踢波一個識嘅技術黎。有啲朋友睇完個標題會諗🤔__你咩？傳地波都要教。版主都知道傳地波係踢波嘅都識，但撇除傳球角度。單純傳波嘅質量黎講又係咪咁好呢？所以今次講嘅技術分享指係集中喺傳球質量嘅上面。
一般傳地波嘅要求
1️⃣個波要貼地
通常比波嘅時候個波要貼地，一黎個波夠去。當個波彈彈下嘅時候，個波嘅阻力大左，而且當你傳個彈彈波比隊友。隊友要用更多時間去控制同修正，特別你啲隊友控波唔叻，一個貼地嘅地波更容易控。佢控得好，冇比人搶，幫到就係自己。
2️⃣直線路徑
一般面對面嘅傳球，最希望係直線，一黎個波食得「應」，唔使用咁多力去比波，而且控起上黎就拎起用腳內檔一控就係。因為有啲朋友用chok 波嘅方法比波。個波一落西，有機會彈走。
3️⃣大細力適中
點解大細力咁緊要，因為太大力會彈走，太細力又會被對手「欄途截劫」。大力反而唔難搞，因為只要係控球高手，將成度力卸走就唔成問題。但太細力就好多時個波去唔到隊友。而一般稱位「醫院波」嘅傳球就係因為太細力。可能係腳腕鎖唔實。又或者擦邊球。所以多數食得唔夠應。
今次嘅技術分享集中去講個動作，而傳球質素都係原於動作質量。
基本傳球動作常犯錯誤❌
1️⃣腳腕鎖唔實
呢個係幾常見，特別係有啲未受過訓練嘅朋友，鎖腳腕對於佢地黎講係非常困難。好多時唔識將腳掌向上壓。令到腳腕處於放鬆狀態，腳腕下垂，當以腳內檔踢球時，難以將力量傳遞到足球上。用個簡單嘅例子，你去一拳打落人地度都會緊握拳頭，手腕鎖緊。對方先會受力。但係好多時踢波嘅時候都係唔鎖。
2️⃣Chok 波擦邊球
首先個人唔反對用呢個方法去傳球。只係有部分角度需要呢個方法去形成弧線傳球。但一啲面對面嘅傳球，一chok波就好難準。甚至需要更長嘅傳球距離時欠缺足夠力量。
3️⃣重心腳企唔穩
好多踢波嘅時候只集中喺踢球腳，而忽略重心腳 (Standing Foot)，其中一個唔穩定嘅原因係重心腳企唔穩，「咬」唔實地下，因為踢球腳擺動時支點不穩，導致明明好用力，踢出黎個波冇咩力。其實就係支點動作唔平衡。令到力量流失。
點樣先可以傳到一個靚地波🤔
1️⃣身體方向
如果有留意，好多傳球時身體方向(Body Direction)唔係向住你嘅傳球目標，咁好大機會你傳球嘅時候你嘅腳內檔係Chok住咁比波。要傳個靚地波，當然係要掃把腳「食」當個波。咁你個身體都對唔正個目標，就好難食得中。個波都唔會傳得直，所以身體向你傳球嘅目標拉一條直線。你就容易擺到大腿去踢直個波。
2️⃣企後一步
當你岩身體方向嘅時後，為左個波踢得順。人垂直企喺球波後面約一步距離。而踢球腳就正正同個波成一條直線，就好似你去篤波之前拉直左條路線。當重心腳踏起個波嘅隔離，踢球腳就可以順勢向前擺。
3️⃣企穩重心
當踢波前，重心腳要緊緊踩實地下，形成一個有效嘅支點去平衡身體，身體保持挺直，而且想個波貼地。仲可以稍稍向前傾，令腳向檔正正對住個波中心偏下嘅位置。踢波時，身體切勿向踢球方向傾側，除左會好容易失平衡令力力量流失，而且係更容易令足球偏離原本嘅傳球路線。所以當踏下重心腳時，要確保整個腳掌由拉弓至踢球後都可以保持原位。有需要將重心腳膝頭微曲，令到身體更易平衡。而且重心腳鞋頭同身體方向一樣，都指同同一個傳球目標。
4️⃣鎖腳腕
當踢球腳鎖緊時，腳內檔位置向住波嘅中心點。腳腕只需稍稍用力向上拉起。好多時唔識發力嘅朋友就連大腿肌肉都收緊，令到踢球動作唔流暢。其實只需要用力將腳掌向上屈曲。放鬆髖關節順勢前擺。由踩實重心腳後輕輕提起踢球腳至踢後後，腳腕都保持鎖緊狀態。
5️⃣順推順擺
用一個簡單比喻，如果打高爾夫球入果嶺轉用推桿。雙手都係捉緊手柄，其它身體部位放鬆發力。記住一個動作要順勢踢落個波度，唔使將小腿提得太高影響活動流暢度。踢中個波之後順勢將個波「推」埋出去 (Follow Through)。
練習方法👍🏻
數節奏
將踏重心腳至踢球動作分成兩個節奏，會較容易順踢之餘，亦容易搵到需要改善嘅地方。
喺個波後一步準備，當踏落重心腳時數1️⃣，踢球時數2️⃣，緊記嘅係當中要連貫。唔好停一停再數第二下。
傳地波呢個Topic係當年版主教練班考試抽到其中一個題目，就咁踢一腳可能好多人都識，但要傳到條直線，有啲半途出家嘅朋友就未必做得好。先唔講傳球視野，最基本有力傳得直係要有嘅，當再精準一啲就要傳去佢左腳定右腳，方便隊友用邊隻腳控球，因為你嘅傳球除左會影響到隊友使唔使用時間修正，甚至方便佢作出下一個選項。但可惜當我教波嘅時候，會見到上述情況。當你話傳好啲，其實未受過訓練，未必知道個準則係點。而呢篇文章我預會好多人睇到個Header 就唔會再睇，當你睇到尾嘅時候，版主除左感謝之外，希望當中呢啲心法可以幫你改善一下傳球質量。加油💪🏻
#少少技術分享 #足球技術提升 #短傳 #短傳訓練 #Soccerfunhk
