【盤房來料】阿里淡友有預知「螞蟻今伏」能力
美國總統大選仍在點票中，一直民調嘅侵侵喺幾個較重選舉人票嘅搖擺州份領先，由於市場估計一旦侵侵敗選或掀訴訟，但若然侵侵以些微票數勝選，咁就解除不明朗因素，美股期貨做好，而港股則表現反覆。
恒指低開149點，盤中曾跌206點，見24733點半日低位，稍穿100日線(24748點)後回勇，曾升153點，見25093點半日高位，並創9月3日以來新高，但25000關得而復失，再跌復200點後又轉升，表現極為反覆。恒指中午收報24933點，跌6點；國指升19點，半日報收10090點。
除咗美國大選，最吸睛嘅新聞當然係螞蟻集團(06688)暫緩A+H上市，市場估計重啟上市需要半年之後。螞蟻難產令科技股開市插水，首當其衝梗係兄弟公司阿里(09988)，半日跌6.2%，其實較預期少咗，隔晚美國阿里BABA跌近一成。至於躺著也中槍嘅騰訊(00700)之前因為螞蟻上市被調高估值，螞蟻上唔到，騰訊亦被拖累，半日跌1.8%，但今早股價落到20日線前即反彈，570至575話咗係上車好機會。JAMTX其餘三個成員反而受惠，低開後即轉跌為升，唔排除係原本打算買蟻嘅資金，分別流入三股，京東(09618)半日升逾3%，美團(03690)再創308.8元新高，而小米(01810)半日升3.4%。
螞蟻只能上樹，未能上市，港交所(00388)咁大嚿肥肉咬到口邊都要吐返出嚟，半日股價跌2.5%，最大鑊係破全球集資紀錄嘅世紀招股竟然咁化學，阿爺一句要KO就咁玩完，睇怕以後中概股回流港股會多咗戒心，而外資見到咁樣，參與度跟信心亦會大打折扣，螞蟻呢單唔好視為個別事件，對日後中港兩地發展影響深遠。
螞蟻之死眾說紛紜，市場普遍相信馬雲衰多口惹的禍，皆因阿爺權威受到挑戰，又豈容馬雲一介商人說三道四，批評領導。不過螞蟻未能如期上市之際，則傳出美國已放棄將螞蟻集團列入黑名單嚟搞針對，有陰謀論者指馬雲聯同阿爺做番場大龍鳳，目的係為咗要美國唔再針對阿里或螞蟻。今次螞蟻上市埋門撻Q，再作重估上市，或者估值更上一層樓都唔定，將來嘅事無水晶球，點會有人知。
不過市場永遠都有春江鴨，喺螞蟻上市前呢兩日，竟然有近億元資金流入買咗阿里熊證及put輪等相關衍生工具，好似有預知未來能力，早料螞蟻上市要被撤回，今早阿里股價裂口低開，呢批阿里淡友當然贏到笑。有口痕友講笑指呢啲交易算唔算內幕交易，又猜測究竟何許人咁醒，喺消息公布前已做定阿里大淡倉，係咪要畀領導先贏。不過呢啲都係當笑話咁睇，其實股票嘅嘢可升可跌，有人睇好有人睇淡有幾出奇，又唔使下下都咁陰謀論嘅。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
#300likes30shares #麥狄文 #盤房來料 #信報網
加入古天后聊天室，享受朝八晚八答股服務，睇最新心水貼士：https://link.stockviva.com/ntodoCj7Iab
課金聊天室：https://bit.ly/31nwXNo
立即下載秒投：https://link.stockviva.com/L9J41qUp01
對聊天室有任何疑問，可以直接聯絡秒投小編：電郵 cs@stockviva.com
注意：本人僅在 "秒投App" 及其網站內開設聊天室，本人並沒有與其他網站，或以外的平台，開設過任何通訊群組，亦沒有任何所謂的「私人whatsapp 群組」「Telegram 群組」等等，為保障大家利益，切勿加入任何類似群組。
