除咗身在日本嗰個禮拜，好似每一次遊行集會都到齊喇，如果係儲印花，相信已經換到一杯嘢飲，你問我攰唔攰？其實好攰。
做足5日，噚日旺角，今日將軍澳，我覺得近呢兩個月對香港各區同埋街道名都熟咗好多。
唔係第一次有人同我講：「辦公室日報叫人罷工，你傻L咗呀？」事實上，個page係多咗藍絲踩場，我諗都有個別讀者見到我失儀地爆粗回應，仲有inbox三日唔埋兩日就嚟幾個恐嚇message，呢個page開檔兩年，最心力交瘁就係呢期。
有個朋友為我好，佢同我講：「其實你唔使下下遊行都出去喎，幾多page都冇出去，文字上講幾句已經夠呃like㗎喇，你有冇見過佢哋有第一身現場相？特別係冇不反對通知書嘅時候，頭盔戴得仲勁；你而家日日出黃色post咁揚，真係連底褲都黃埋，你學下其他page啦，永遠唔會正面講，含糊其辭抽下水，咁又唔會得罪人，又可以呃光環。」
成日發夢，成日夢遺，條底褲梗係黃㗎啦！
然後佢開咗幾個page畀我睇，全部冇參與過遊行，全部冇直接講過任何一句有明確立場嘅說話，但依然好多人支持，好過我打一篇千字文，仲要唔使畀人狙擊，唔使畀人檢舉，仲有好多生意等緊佢。
想安安全全嘆冷氣呃like，又想fans崇拜你，又想唔得罪任何客人，繼續賺大錢，你覺唔覺得自己好虛偽？瞓得著咩？面對到自己咩？面對到幫你做嘢嘅人咩？
我本身唔係政治狂熱嘅人，但每一次諗起元朗黑夜都過唔到自己嗰關，唔好分咩黃絲藍絲，我諗小學生都睇得出係警黑合作，正常人出街要畀人打，你一啲都唔嬲？到而家拉咗幾多個？有冇名有冇姓？幾時提堂？走甩嗰班呢？全世界都幫手起底，請問拉咗未？幾時告？幾時上庭？請問係咪黑社會大過警察？請問係咪黑社會凌駕政府？
市民畀人打，元朗警署拉閘唔救人算唔算罷工？警察可以罷工，你唔可以罷工，啖氣真係吞得落？係咪要你自己同埋你屋企人畀人打先至肯發聲？但係我想講，今次唔發聲，今次唔團結，你可能以後唔使遊行示威㗎喇，到時香港已經冇機會。
正如呢個路牌一樣，面對暴政，沒有中間道。
#其實星期一唔止罷工
#仲要七區開花
#唔好認命
