乜搞單咁嘅嘢呀？通常呢啲事一發生，就搞到求職者對獵頭公司有戒心......唉！
唔講呢筆住，講咗點自保先，我到今時今日都仲會收到有齊身份證號碼、詳細屋企地址，甚至父母聯絡資料嘅CV，呢類求職者不乏高學歷人仕，究竟係太輕易相信人吖？抑或唔明白保障自己私隱嘅重要性呢？
市面上好多公司都會收集個人資料再轉售，賣俾call center又有，財務公司又有，健康美容都有，否則大家點會每日收到咁多不良銷售電話。
Send CV出去搵工無可避免，但個人資料適量便可，地球太危險喇。
姓名 ------> 如果你叫Pakho周柏豪，其實寫Pakho Chau已經ok，最重要係方便人哋打嚟稱呼你啫。
年月日出生日期 ----> 絕對唔使，唔該唔好再填，啲HR或者Headhunter係唔會送生日禮物俾你架。
地址 ------> 搵工啫，唔係借錢，填地址把鬼咩，填地區都夠啦，請咗你先填full address都未遲。
身份證 ------> 真係唔好喺CV寫身份證呀，遇到啲轉售資料嘅公司，真係十條命都唔夠死，而家有啲財仔直情有身份證number再對啱個名就借得錢，你諗下幾危險。
婚姻狀況 ------> 冇乜所謂，有人覺得Single會搏啲，亦有人認為結咗婚穩重啲，冇路捉。
性別------> 冇乜所謂，有人鍾意仔，有人鍾意女，你個名睇唔出係男係女，打嚟都應該聽得出。
科技愈嚟愈發達，私隱度就愈嚟愈低，與其望啲公司將你個人資料好好保管，不如自己把關仲實際。
畀返credit #明報即時新聞 先
