打橫嚟講：唐玄奘、三藏、武松和老陳
年年這個時段，五月底，總三番四次聽聞狗吠，聲嘶力竭出盡飲奶力，嘷叫六四晚天安門廣場無死過一人。當夜的殉難者，每人一泡尿，足以淹死這些冷血無恥的畜牲十八代呀！無人死！
再講呢啲禽獸，也有失斯文，倒不如開壇同大家研究吓一啲廣東正音吧！
無綫播緊嗰套大陸劇《西遊記》，配上粵語，除了那孫悟空係又笑兩聲，唔係又咭兩嘴，加埋豬八戒的講嘢像戴咗面具有回音之外，最惡頂，乃係劇中所有人，將「唐玄奘」叫成「唐玄『狀』」。係！多本中文字典都把「奘」注音為「藏」，但「藏」字亦有兩個注音，分別為「狀」和「牀」。
「寶藏」、「西藏」、「大藏經」的「藏」，讀「狀」音。
「躲藏」、「珍藏」、「臥虎藏龍」的「藏」，唸「牀」。
咁！點解TVB配音員將「唐玄奘」叫「玄『狀』」而唔叫「玄『牀』」呢？
另外，我們香港人從小到大，不論讀書上堂，或街邊聽古，說書人都叫「玄奘法師」為「玄『裝』」，從無人叫「玄狀」或「玄牀」的，即使「唐三藏」，也只會叫「三『狀』」，而無「三『牀』」的，所以，睇TVB版的《西遊記》，特別哽耳，即如聽到「武松」唸做「武蟲」一樣！
全坊間皆將「武松」叫做「武寵」時，總有些不學無術的「字典派」，唔知地（此處讀「訂」音）的跳出來，攞住本大陸標音的字典，嘷叫「松」字，只注「蟲」音，何來個「寵」音呀？唉！當全球叫「老陳」做「老診」時，你咪叫「老塵」囉！我不會笑你讀錯字，但會原諒你的無知嘅！
我雖有容人大量之心，但聽聞一些卑賤撩交打的畜牲怪聲，一定用普通話喝佢「厚低調」囉！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊𥄫實政府
