話科技共你經歷創傳奇，相信冇人反對。早幾日青嶼幹線大嶼山及馬灣收費廣場，一推雙向收費，就搞到屯門大冧檔。龍尾夠膽死排到去屯門公路近掃管笏。運輸署Say sorry，Ok，但原因竟然話係因為唔夠收費亭去收錢？哈，咁仲唔係香港原始經歷創傳奇！
如果當日有遊客問點解會塞死，有冇香港嘅代表可以講一句「沒什麼，只是國際城市香港不夠收費亭」而唔面紅呢？喂喂喂，依家2017年，「大陸電子支付好發達乜乜物物」呢句都講到口臭，但香港人到今日今日仲係興用現金過隧道。
香港電子道路收費設施，係由「重慶李嘉誠」張松橋嘅港通（032），其持一半股權嘅快易通獨攬大權。睇返港通年報，Autotoll 2016年全年，用戶總數約為31.76萬名，按年只係多咗1萬人多啲，持牌車輛滲透率平均約為40%。睇埋每日處理量，大約403,000架次，所涉及金額約為港幣980萬元。另外，根據政府2016年的年報顯示，當中只有約47.7%的駕駛者經過收費亭時會用Autotoll。以此推算，即係每日全港隧道收費員，係處理近千萬元現金！
由搵散紙，到伸手出車箱，再去交收，等幾秒找續，天呀！光陰一刻值千金，每過60秒就有一分鐘過去，但每日有40萬架車每日甘願花寸寸光陰去用Cash過隧道！香港到底落後到一個咩點？
「喂唔係呀！最新香港隧道可以用八達通畀錢啦！」親愛的，八達通是二十年前的技術；「仲有呀，Autotoll轉咗用RFID貼紙啦，一張貼紙就收到錢啦」親愛的，RFID咪就係八達通個技術。其他國家，根本連收費站都唔需要，收費站？咩來的。
有人話，電子支付興唔興，係市場決定。Fine，不過當你試吓叫搵食車司機用Autotoll？佢哋會話，「你月月俾行政費，仲要玩增值，架車又唔係我嘅，條數要計係咪煩先。」再來，你叫的士界推電子支付，佢哋又會話「你電子收費，我咪要交稅？最慘係咩呀，我老婆咪知我一日搵幾錢，咪搞我。」
市場問題，市場解決。不過，香港落後呢個現象，到底係鬥緊市場力量，定係鬥邊個夠大聲？嗯⋯應該係鬥緊邊個廢。
by千頌C@堆填區
http://fb.com/winbigwok
