我真心很喜歡的一套香港電影，剛剛上畫就聽說票房不太好，可能很快下畫，雖然與我沒有關係，但仍為這個作品台前幕後有點難過。
明天，找個時間，我想再去支持。
《大樂師．為愛配樂》影評
「因為麥子的顏色」
（含劇透慎讀）
—
—
—
—
—
尋晚睇咗呢套電影嘅時候，唔知點解成日會諗咗其他嘢。由第一幕戲第一句對白鄭中基話「挑，鳩嗌」，然後不斷躁狂，要聽到「大力妹妹」嘅歌先平復到開始，我已經覺得套戲唔止講音樂，亦講人生。（有評論指此幕戲侮辱了HEAVY METAL，我不認同，只是反映角色不喜歡這種音樂而已。）
—
戲入面主要嘅人物有幾個，唔理佢哋有無錢，都各自都面臨緊自己嘅一啲問題。例如顏卓靈雖然有一個一炮而紅嘅韓系男友，好似好幸福，但原來佢都面對緊不忠、出軌、貌合神離等等嘅感情問題，而佢寫嘅歌亦無人聽，甚至無靈感去完成整首嘅作品；鄭中基、白只、姜皓文就更加唔洗講，爭人周身街數，日日比人斬，過住窮到燶嘅生活，而佢哋過住咁嘅日子，又有乜可能建立到健全嘅人格呢？白只搖風擺柳，無咗自己，鄭中基躁狂，而其實姜皓文喺戲入面都面對住嚴重嘅精神問題，佢嘅狂躁可能比鄭中基更嚴重。
—
「見山不是山，見水不是水」，音樂令鄭中基同顏卓靈睇到第二個世界，明明喺個廢車場比何華超劈緊，鄭中基竟然見到班古惑仔喺度跳緊舞；明明顏卓靈比人綁咗票好危險，喺生死存亡嘅關頭，佢竟然繼續寫自己果首無人聽嘅DEMO，毛巾為琴，樽為鼓，無嘢係死得人。
—
生活喺香港，百物騰貴，經濟結構單一，除非你含住金鎖匙出世，否則你好難逃避社會比你嘅壓力。顏卓靈男朋友話佢同大力妹妹「唔同步」，譚卓基係一個嗜錢如命嘅人，而蔡潔亦精打細算，佳偶天成。喺另一方面去睇，其實鄭中基同顏卓靈都係一個敏感嘅人，記得一開始鄭招呼大陸佳麗的時候，一些並無不妥的鈴聲就足以令他崩潰；而顏卓靈在與鄭中基初次見面的時候，亦花了很多的唇舌連珠炮發希望對方會放走自己，反映她對生活敏銳的觀察。
—
《大樂師為愛配樂》的核心命題誠如宣傳策略一樣，是講「治瘉」。究竟咩係治瘉，用廣東話去講，就係「一物治一物」。狂暴嘅鄭中基唔知點解聽到大力妹妹嘅歌，心情就可以平復起嚟，顏卓靈喺絕望嘅時候，聽到魚排入面所有大自然聲音協奏嘅交響曲，又好似有番希望。
—
點解會治瘉到？呢樣嘢其實無得解，一個不修邊幅嘅大男人，明知個女方都睇唔到嘢，但佢會著番衫。粗枝大葉嘅綁匪無啦啦會幫肉參整結他，砌鼓，買鋼琴。可能有啲人覺得自己生出嚟就係咁架喇，「江山易改，品性難移」，亦無必要去改。但電影話比你聽，你只係未遇到你願意為佢改變嘅事物或者人，鄭中基遇到顏卓靈，大男人都會變GENTLEMAN。
—
套戲講音樂，但意義不僅止於音樂，重點係你必須搵到能夠治瘉你嘅東西，好多人都會經歷過人生嘅低潮，你又記唔記得喺啲咩幫你重新振作？呢樣嘢可以係一種嗜好，可以係一味好好食嘅菜，可以係一樣運動，亦可以喺一個人。而就算呢樣嘢其他人唔理解都唔緊要，正如「大力妹妹」都只係得「小魔女」一個粉絲，有人願意費盡心思去配樂，有人願意早睡早起戒辣戒煙游水健身而去唱果首歌，「一個傻嘅，一個癲嘅」，就足夠了。因為經歷，令世界唔再一樣，正如小王子中狐狸看到麥子的顏色，就會想起小王子一頭金黃的頭髮，現實世界轉化為意義世界，由普通的魚排化為一部於海上閃閃生輝嘅鋼琴，意境多美。
—
最後是選角，印象中鄭中基以前給人的印象不是很好，少爺仔醉酒鬧事，但婚後形象愈來愈好，家庭美滿，事業有成，豈又不是戲內戲外浪子回頭的對照？
—
（如果你咁有心機睇到嚟呢度，一篇觀後感其實要寫嘅時間真係頗長同相當費心力的，正如呢篇野都過左一千字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
—
大樂師．為愛配樂 Concerto Of The Bully
Cherry Ngan 顏卓靈
Ronald Cheng 鄭中基
白只
姜皓文
蔡潔 Jacky Cai
Chrissie Chau 周秀娜
A.Chow 周祉君
Tony Ho
