職場劏豬櫈
好多腦細到𠵱家都唔明白，公司一敗塗地，頭頭碰著黑，佢哋至係問題癥結所在。太多主意，太多不切實際嘅計劃，做得嘢嘅人太少，請幾多，走得更多，正所謂「蜀中無大將，廖化作先鋒」。兼且朝令夕改，無一個執行到，導致架床叠屋，官僚無效率，工作漏洞處處，腦細仲厚顔無恥咁講：「形勢一片大好。」
好大喜功唔在講，又要威，又要戴頭盔，偏偏志小才疏，事事干預，電腦財務唔撓，工作流程唔在行，前線激勵唔屑做，最慘係層壓式管理，諉過於人，正經事唔做，笨實事做到開晒巷，妄想透過開會開會再開會，加班加班再加班，報告檢討PowerPoint，萬千project賀豬噏，無限輪迴，劣幣驅逐良幣，優秀人才走吓一個，走吓三兩個，跟住聯群結隊齊齊較腳，面對呢種情況，你都唔心淡？
老海鮮作為幫兇，唔係指年紀大細，而係指自卑自大，狐假虎威，見高拜見低踩，揸住雞毛當令箭，事事以規矩當作擋箭牌，通通都係有奴性無人性，阻住地球轉嗰隻。老海鮮嗰浸蒢，嗰浸酸宿味，又厭尖又縮骨又虛偽又大支嘢，好惡頂㗎，陳李張黃何，史廖林白蔡，都走咗，你點解仲唔走喎？
正所謂「壯志未酬身先死，長使英雄淚滿襟」，算罷啦，有名你叫，死海喎，職場劏豬櫈喎，壯士斷臂，引刀成一快，辭職啦，無謂虛度光陰，我勸你。
後記：
無一份工係無嘢學，最差嘅腦細高層中層，都可以學佢點屎點無料點無理取鬧，只要蝕底啲謙虛啲大膽啲好彩啲，梗有嘢學，有錢收之餘，仲可以累積履歷經驗人脈，半年好囉，頂盡一年，祝君好運。
大支嘢 在 大支嘢TaiGYeah - YouTube 的八卦
Share your videos with friends, family, and the world. ... <看更多>