《阻人收工真係要俾人燒春袋架》
喺呢個世界裡，永遠有啲人覺得一句「我有錢俾」就大哂。
完全唔明我哋打工仔心中都有一句「我唔想賺你錢」。
當然啦，你唔想賺啫！但公司想賺呀嘛，
咁就會形成「收唔到工」嘅狀態。
而香港服務行業嘅前線人員，基本上每一日都接受緊「俾人阻住收工」嘅情況。
後生暑假嗰陣小弟都做過下Part Time Sales。
當你親眼見識過啲人，明明拉咗半閘都仲要捐入嚟嘅時候，
除咗令你佩服佢國家嘅越野本能，仲教曉你呢個世界咩都有可能。
遇上呢種特發情況，幾位全職同事剎那間都「你眼望我眼」，礙於「關家姐事件」在前，大家都唔敢對呢位阿嬸作任何阻撓。
全職同事要明節保身，我依啲「19」PartTimes仔自然挺身而出，
當然我受過「顧客永遠是對的」嘅教誨，都好聲好氣同佢講：「唔好意思呀小姐，我哋收咗工啦。」
「得啦，我會買嘢架啦。」阿嬸連正眼都無望我。
救命呀，我係咪同外星人溝通緊呀！我收工同你買嘢有咩關連呀？
我心諗：「你想買嘢但落咗閘咪即係無得買囉，死返出去啦好嘛。」
「我哋聽日開10點..如果小姐你...」我真係想一掌推佢出去。
而我都未講完，佢又彈一句：「得啦，我會俾錢架。」
阿嬸keep住無望過我。
我發現咗外星人。
當一個阿嬸覺得其他人要為佢嗰「一千幾百」而臣服嘅時候，佢已經脫離咗太陽系嘅軌道，正式駛入咗「死臭系」星雲。
同時間佢「肯買嘢就益咗你哋」嘅概念存在好大誤解，
其實準備收舖一刻，佢就算強逼要入嚟，我寧願佢睇下而唔好買嘢。
點解？因為埋咗數囉！
係架，我哋依啲打工仔，終生都要屈服喺「公司System」之下，而又唔係所有公司嘅System都高智能，九成九都係弱柒智。
其中最佳例子就係「埋咗數就好難開單」。
簡單嚟講就係每日要計俾公司知「今日做咗幾多生意」。
條數本身已經亂，如果埋好哂無拿拿殺張新單出嚟，就會亂上加亂。
而且一不離二，你收得佢錢，後面個阿叔又可能一時興起買下嘢，
所謂羊群效應，三姑六婆推波助瀾，咁你就埋唔到數，收唔到工。
不過呢啲咁深層次嘅Psychology，
聽見阿嬸一口流利普通話，你都知同佢解釋仲衰過「對牛彈琴」，
困難程度等同「對Tree Gun談人生」，慳返啖氣好過。
我就Hea住招呼佢，想佢知難而退；
佢就呼呼喝喝，好似我前世欠咗佢。
阿嬸要嘅嘢一係無新；一係無Size，我心中暗喜，想佢速速閃人，不斷用好普通嘅國語同佢講：「堆Bu遲，姐哥刀美友啦！」
收銀嘅同事都握緊拳頭，為我吶喊助威，
我就好似美斯扭個三件，單刀面對龍門一樣，入嘅機會係百份之九十！
「就這對吧！」阿嬸突然大喝一聲。
美斯射失...抱頭痛哭。
條粉皮唔知係咪面子問題，死要買嘢，而佢要嘅係一對拖鞋。
係一對拖鞋...幾廿蚊嘅沙灘拖...
你話佢掃幾千蚊我都仲可以安慰自己「幫到條數」，呢一刻我真係崩潰。
阿嬸一邊俾錢一邊恥笑，好得意揚揚咁話自己真係有幫襯，係尊貴消費者，仲講到我哋遇到佢係好彩，臨尾可以做多單生意。
大家敢怒不敢言，明明收10點，俾佢搞到10點半，仲未計執返好啲貨同埋數，守尾關位同事分分鐘收11點。
係嘅，有啲公司好啲，會計返OT鐘俾你。
但佢哋永遠唔明打工仔心入面嗰句係：「我唔要你啲OT鐘，我淨係想準時走咋。」
其實有時行街，無論賣衫又好餐廳又好，見到人哋都開始拉閘，未入去嘅咪第日先睇、入咗去嘅都醒水自己走人啦。
餐廳收十點，你食到9點11咪埋單囉，抹你張枱都要時間呀大佬！
大家都係人啫，返工無非都係想收工，
使唔使阻人收工咁無陰公呀！
IG:cheungson88
喝普通話 在 共享普通話- 喝早茶 - YouTube 的八卦
Transcript · 共享 普通話 - 花展 · 【瘋狂粵語】沒有梁啟超，可能就沒有港式茶餐廳 · 香港的飲茶文化: 得閒飲茶啦喂! · 《直呼簡易拼音》第一課：許多人學了多 ... ... <看更多>