上女友屋企拜年，點知激嬲晒佢全家。
大年初二，已經係第三年去女朋友屋企，但年年都好似有股引力咁，令我不知不覺間犯錯。
例如上年，我喺女朋友耳邊細細聲講咗句：「Uncle好似去完廁所冇拉褲鏈。」點知女朋友玩嘢勁大聲咁同佢老豆講：「我男朋友提你拉番條褲鏈呀！」
Uncle從此冇再同我講過嘢。
今年，我決心要食一餐滿分嘅開年飯，令女友一家高高興興。
「你記得準時到呀，唔好要我成家等你！」女朋友最後一個提醒。
所以我一大清早就起身，著得靚靚仔仔，梳個靚髮，最緊要記得拎埋送畀伯母啲花膠燕窩，提早咗一個鐘出門口。
雖然有少少塞車，但好彩時間充足，結果我早咗十五分鐘去到。
準時，達成！
「新年快樂，Auntie，身體健康，呢度小小心意。」我踏入女友屋企門口。
「哎呀，上嚟食餐飯坐下咪得囉，唔使咁厚禮啦～隨便坐下啦，我整埋少少餸先～」Auntie笑容滿面，似乎我有個好嘅開始。
女朋友屋企唔算太多人，Uncle、Auntie，一個阿妹，同埋佢另外一位阿姨同佢個仔，連埋我一共七個人。
我同Uncle打聲招呼，但佢應該仲嬲緊我，只係點點頭就算。
阿姨同佢個仔就同我講聲「新年快樂」。
而最出奇嘅就係佢阿妹，莫名奇妙咁啤住我，好似好憎我咁，我同佢Say Hello，佢就即刻入房關埋門。
我有啲不詳嘅預感。
我問女朋友發生咩事，佢話：「一陣你咪知。」
正式開飯，女朋友嘅屋企人同親戚都係好友善，唔係好似我屋企嗰邊咁撩交鬧，不過佢阿姨因為第一次見我，所以都有問：「係呢，你做咩㗎？」
當我想開口之際，女友阿妹搶答：「人哋寫嘢㗎！寫啲愛情文！」
阿姨：「作家呀，好勁喎，唔怪得斯斯文文咁啦！」
我有啲唔好意思：｢過獎喇，唔算好勁，都係隨便寫下嘢咁。」
阿妹即刻啤過嚟：「隨便？！咁你以後唔好再寫喇，我唔想再睇到你啲文！」
Auntie開聲幫我解圍：「呢餸啱唔啱食呀？」
我笑住話啱，然後醒起上年嚟食飯，女友阿妹隔離有男朋友，仲好甜蜜咁，話好鍾意睇我啲文。而今年佢男友冇上嚟，阿妹又眼紅紅同咁憎我，我諗佢哋應該分咗手⋯⋯唔怪得突然咁憎我。
再傾落去，阿姨個仔知道我筆名係莎比亞之後，好激動放低筷子：「哦！就係你條友！女朋友日日Tag我睇你啲文，有時睇完仲鬧我點解唔學下你！原來就係你！！！」
阿妹、阿姨個仔已經嬲咗我，真係躺著也中槍。
但好好彩，成餐飯再無風無浪，好和平咁食完。
「食完飯，咁齊人，開枱打牌啦好唔好？」根據女友屋企習慣，飯後會打番幾圈，前幾年佢哋一家自己打我觀戰，但今年阿妹失戀唔想打，所以Auntie就叫我落場：「細細哋一齊玩吓啦？」
「我⋯⋯唔係好識打，不過咁高興一齊玩啦！」我講咗個大話，其實我喺大學時期，日打夜打，但唔通我係雀王又話畀Auntie你聽咩？
如是者，Auntie、Uncle、阿姨、同我就展開咗「麻雀風雲」，女朋友坐喺Auntie後面，同我提下水鬆下章。
一開頭我做下戲，摸牌出牌都慢吞吞咁，畀佢哋笑站長，又出下銃畀大家，仲試過一炮三響。
全都喺我計算之內。
但後尾我開始癮起，食下啲雞糊同對對糊，有次我一大叫「食！又係雞糊～」，Auntie即刻黑晒面，話要去一去廁所，女朋友即刻行埋嚟同我講：｢喂，你搞咩呀，我阿媽差一隻就十三么喇⋯⋯」
我面色一沉。
牌局繼續，我先係醒目咁又再出下銃畀Auntie，但佢食嚟食去都係啲細糊，所以未開心番。
直到最後一圈⋯⋯我一開就係一手好牌，再砌下砌下，居然就係伯母想食嘅十三么。
不過我梗係醒目，無論佢哋打咗幾多次我想食嘅牌，我食到都唔食，忍住捱埋呢局。
但到咗最後一隻牌，輪到我摸，居然「自摸加海底撈月」⋯⋯呢個時候，我條癮終於忍唔住，唔食真係行一世衰運⋯⋯
我興奮大叫：「自摸十三么！海底撈月！」
全場靜晒，Auntie、Uncle、阿姨塊面史上最黑。
三人憤而離席。
女朋友都捨我而去⋯⋯
我入到去廁所洗個面冷靜下，一出嚟Auntie咁啱喺廚房出嚟，我以為佢仲嬲緊，但拎咗封利是畀我：「祝你寫作順利，我呢個女有時脾氣好差，辛苦晒你照顧佢喇，得閒多啲上嚟食飯啦，煲湯畀你哋飲！」
「多謝Auntie⋯啱啱舖牌⋯⋯」我唔忍心講落去。
「傻啦，打牌開心吓啫！」Auntie講完之後，就先我一步出番廳。
我企喺廁所門口，望住手上嘅利是，Auntie從來都好支持我哋兩個，冇留難我呢個唔出息、冇私樓嘅男朋友，真係有少少感動。
「咳咳～」
「吖，唔好意思。」
Uncle想去廁所，打斷咗我嘅感動。
食完飯，打完牌，差唔多時候，女朋友就想我一齊去拍吓拖行吓街，臨走之前喺門口同大家講拜拜，似乎終於捱過咗呢一餐，但竟然又畀我發現Uncle佢⋯⋯算喇今次唔好再出聲。
「係呢，頭先我阿媽同你講咩？」女朋友一路行一路問。
「冇，畀利是我同埋叫我得閒食飯啫。」我拎封利是出嚟畀佢睇。
「咁你下次仲上唔上嚟？」
「上！點解唔上？不如妳聽日都上嚟我屋企食餐飯，陪下我阿媽好唔好？」
女朋友點點頭。
女朋友比我醒目得多，好識氹我阿媽，一定唔會好似我咁，想拎滿分但結果今年都係激嬲晒佢全家。
－－－－－－－－－
多謝收睇呢兩日嘅拜年小故事，希望狗年大家會繼續支持我，睇我啲故仔啦！
啫啫雞煲意思 在 [你知道嗎]啫啫雞煲的「啫啫」是什麽？ - YouTube 的八卦
... <看更多>