隔籬team有個新人返咗工幾日，暫時未可以自己一個做interview，佢阿姐要sit in聽埋一份，其實壓力都幾大，因為上司全程睇住你點樣同求職者傾計，感覺真係好唔自然。
見完之後，個新人就畀佢阿姐捉住做檢討，期間講到個求職者全程數臭以前啲舊公司，新人問：「除咗係咁bad mouth之外，其實呢個candidate都ok吖，我哋應唔應該send佢份cv畀客？」
佢阿姐：「都可以嘅，不過你要brief下佢到時唔好再bad mouth舊公司喇，好蝕章㗎！」
新人：「好，不過佢會唔會覺得我教佢講大話？」
佢阿姐：「唔係講大話，佢唔需要讚，但唔使出力彈。其實好多公司請人嗰陣，都好想聽下求職者點樣評價過往嘅僱主，如果佢個個都唱衰，自己都可能有問題，次次都咁唔好彩？其實同拍拖一樣，分咗手就係咁唱衰啲ex，有少少肉酸。」
坦白講，喺香港要連續遇到幾間衰公司同埋衰老細有幾難吖，命中率係幾高㗎，不過我同意佢阿姐嘅講法，bad mouth真係好蝕章。深入啲去睇，照道理去見工嗰陣，對方都係第一次見你，就當你份工要in三次好未？再當你三次都in同一個人好唔好？對住一個唔係深交嘅陌生人訴苦，講以前返工啲血淚史？其實冇呢個必要，好熟咩？
如果唔係訴苦，bad mouth講到尾就係另一個原因－－－強化當日離職嘅決定，但係咁喎，同你interview嘅人唔係HR就係department head，甚至係老細，佢又會企喺咩立場？彼此價值觀未必一樣，因為角色唔同，你所受嘅苦，佢係感受唔到，或者感受得到，亦唔方便表態同埋認同你。
最重要嘅一點係，佢哋驚請咗你之後，將來你走嗰陣又周圍唱衰佢公司。
有個HR曾經同我講過，某次interview遇到一位求職者，睇CV已經知道佢舊公司好惡做，行內臭名遠播，因為同一個圈子真係好窄，有咩衰嘢好易一傳十，十傳百。本身個HR諗住食花生講埋一份啦，點知個求職者冇踩冇彈，佢嗰一刻嘅感覺係：「呢條友都幾有口德同幾有品喎！」
結果請咗呢位求職者，佢舊公司個阿head覆返reference check嗰陣寫到好衰，個HR話：「其實我份reference check form淨係要佢剔入職同離職年期啱唔啱？Title啱唔啱？同埋有幾個例牌題目對在職時表現評分，剔ABCDE就得喇，點知佢舊阿head走去print出嚟，親手用原子筆寫comment，scan完再send份pdf檔畀我。」
「咁最後有冇影響？」
HR：「冇影響！都冇人問佢comment，作段文過嚟做咩啫？個求職者又冇bad mouth，反而前上司大費周章寫段嘢嚟唱衰，司馬昭之心，路人皆知，一場舊同事點解要斷人米路？我自己都係打工㗎！」
唔該多啲呢類好HR，香港靠晒你哋！不過諗真啲又唔難理解，正如我哋揀朋友一樣，最令你安心都係一啲厚道嘅人，而唔係一輪咀數臭呢個嗰個嘅是非精，所以bad mouth的確係蝕章，呢段時間想搵工轉工嘅朋友，可以參考上述嘅例子，希望你哋去interview嗰陣有更好嘅發揮。
唔使send三次 在 《區區有女神》十優麥明詩返女拔教師妹做「撞完」 - YouTube 的八卦
難啲啩你識唔識佢係邊個呀小廚神嚟㗎小廚神亞軍呀咁你而家鍾意煮咩食er... 希望可以煮到一啲又靚又 ... 出爐港姐專訪麥明詩壓力爆煲喊 三次. on.cc東網. ... <看更多>