緣定今生
二十九年前嘅今日，我同愛人，即係老婆大人，相識三個月，已經情投意合，過多三個月，決定儲錢結婚，九個月後，即係二十八年前嘅今日，一九八八年三月十六日，一張婚書，幸福到今日。
有人問：「你老婆有乜好，你鍾意佢啲乜？」咁膚淺嘅問題，唔應該問，因為我唔會鍾意有人問老婆大人：「你老公有乜好，你鍾意佢啲乜？」
兩情相悅，緣定今生，真正嘅愛情唔講package，唔講條件高低，講究心靈相通，心心相印，你心中有我，我心中有你，永遠心甘情願將最好嘅部份，留畀愛人，絲毫唔覺得委屈犧牲。
老婆大人聰明過我，精明過我，識字多過我，靚女過我，樂觀過我，熱心過我，對身邊人好到無得講，但我以前廢青一個，每個月賺三千六，竟然睇上我。唔止咁，寧願犧牲自己天份，放棄大好前程，全心全意愛我同埋家人，無佢，我肯定無今日，無佢，我只係一個平庸嘅獨行俠，無佢，我根本唔想做人。
唔介意有人話我肉麻，因為愛可以化解人世間嘅戾氣，越多人宣揚越好。無論男定女，十幾歲定幾十歲，事業有成定普普通通，唔應該戇居居將愛收埋喺心入面發霉，而係要時時公開講，茄輪日日打，等愛人睇到感受到享受到舔到濃情蜜意嘅愛，時時刻刻如沐春風，感染身邊人模仿。
兩年前結婚周年紀念，連寫老婆大人十一日，𠵱家cap啲圖畀大家欣賞。睇完，或者明白，咁真咁可愛咁有趣嘅女人，唔嫁佢，嫁邊個，唔愛佢，我就儍；如果唔明，無所謂，我明就得，老婆大人知道就得。
上天啊，結婚二十八年，太短喇，一萬年喇，可以嗎？
儲錢 在 6個月如何快速儲20萬？ | 16個儲錢技巧 - YouTube 的八卦
6個月如何快速儲20萬？ | 16個 儲錢 技巧⬇️如果你想用最短的時間認識投資，並組成得到一套自己的投資組合，我整理了一份45分鐘內可以看完的「14頁濃縮 ... ... <看更多>