我咁樣用八達通
文：薯伯伯
唔同人對「八達通」有唔同睇法，好正常。
但我自己個做法係，平時消費，唔用八達通，只用現金或信用卡。
去黃店，用現金，唔駛佢哋畀銀行手續費。
去勁大型兼算係有良心嘅連鎖店（唔講名，但心裡明白），用信用卡順便儲積分。
至於藍店，唔好意思，完全無幫襯。
但係，坐公共交通工具，我通常會用八達通，因為要攞番政府嘅交通賠償。
強調，唔好同我講呢啲叫「交通津貼」，呢啲叫賠償。呢個政府掌握咁大權，當初無好好把關，而家武漢肺炎肆虐全港，全靠香港人嘅自救意識去抗疫，然後你出少少交通金額，就叫做「津貼」？
呢啲叫做賠償。
呢啲叫做賠償。
呢啲叫做賠償。
政府賠償香港人嘅交通金額，喺 2020 年 7 月 1 日之前，係 HK$ 400 以上先有賠償，2020 年 7 月 1 日以後，變成 HK$ 200 以上就有賠償。
罷用八達通，原則上我係支持，亦有做實際行動。
但講到交通工具，我會同大家講，如果無其他考慮，強調無其他考慮，再三強調無其他考慮，我認為攞足政府嘅交通賠償，係天經地義。
唔好因為見我坐電車用八達通就問：「而家重用八達通？」
你分清楚使用嘅場景，按自己實際嘅情況去處理，我覺得係最合理嘅做法，唔駛事事一刀切。
總結一下：
一，去小店，儘量用現金。
二，去黃店，都儘量用現金。
三，去藍店，你有病？
四，坐公共交通工具，如果你無其他考慮因素，可以照用八達通，攞盡政府嘅交通賠償。
五，有心儲信用卡積分嘅話，可以用八達通個 app 去用信用卡增值，上網自己搵教學。
歡迎討論，但唔好同我講：「而家重用八達通（去坐公共交通工具） ？」
請講出理由，請用理由去說服我。如果單純一句「而家重用八達通」，講真，我係有啲睇唔順眼。
（照片：Jon Tyson）
———
Pazu 薯伯伯的 Patreon 專頁：http://www.patreon.com/pazu
交通津貼 在 交通補貼登記教學【八達通｜全月通｜都會票｜全日通篇】 的八卦
... <看更多>