中午時分, 走到一間私營老人院, 準備開始我外展到診的工作。
我坐在大廳中的飯桌前, 整理着牌板。一位叔叔慢慢的走到我面前坐下。
我打開叔叔的牌板, 翻閲着他的病歷。叔叔66歲。他有糖尿病和血壓高, 又試過跌倒後臗關節骨折。這間老人院没有配備電腦, 醫生到診時會有點不方便。
「叔叔, 我係醫生, 嚟睇你嘅。你啲糖尿控制得嘛嘛喎。」我看着打印出來的驗血報告, 他的 HbA1c 有 9.3%, 屬偏高水平。HbA1c 屬長期糖尿控制指標, 一般而言希望控制到 7% 以下屬較理想。
「佢唔戒口㗎。」在旁的老人院職員搶着向我報告: 「佢日日都落去飲茶㗎。」
「你好鍾意去飲茶㗎? 你飲茶食啲乜多㗎? 」我問叔叔。傳統香港人總愛上茶樓一盎兩件, 朝早没有上過茶樓, 就好像欠缺了什麼似的。
「我鍾意齋腸同雞仔包。」有糖尿又愛飲茶的病友總說自己只吃腸粉和蒸包, 認為這樣較為健康。
「雞仔包啲餡都好肥㗎。」我要求好像有點高。
「飲慣咗唔飲唔舒服㗎。」叔叔笑着對我説。
看着叔叔, 只有 66歲, 又行動自如, 自由出入。忽然想起他為什麼要住老人院呢?
「叔叔點解你入咗嚟呢度住嘅? 」我問叔叔。
「唉。佢啱啱入嚟唔行得㗎, 住住吓先越住越醒喳。」職員聽到我的提問立即插嘴。
「係個時醫生話我唔適合係屋企住我先嚟呢度㗎。」叔叔身傾前對我說。
「哦。個次骨折做完手術之後。」我看着記錄回應: 「有無諗過番屋企住? 」
叔叔行動自如, 又能照顧自己, 我的提問似乎也合理不過。
「佢一個人㗎, 出面無人無物㗎。」職員又插嘴。
「哈哈。」叔叔笑笑口。
「呢度咪佢屋企囉。」職員拍拍叔叔肩膀。 似乎他們也很有默契,相處也很融洽。 畢竟叔叔在這裏也住了好幾年。
環境熟悉了, 要改變, 談何容易? 要他改變, 反而是强人所難?
希望叔叔也滿意在老人院的生活, 繼續享受每一天。
