【香港製造Granola】純麥片製作社
#非自購 #真感受
因為收到純麥片製作社送嚟嘅Granola，
呢排都係食佢做早餐。
純麥片製作社成立唔夠一年，
只專注賣一種產品—Granola。
如果我同你講麥片，
你聯想到嘅可能係麥皮、可能cereal、可能係muesli...
但係佢地賣嘅係Granola，
即係由燕麥片加入調味烘烤出嚟嘅產物，
特點係香口脆身有甜味得嚟無cereal咁多添加物，
又無麥皮咁寡。
要注意雖然呢啲產品形象「健康」，
不過都係有油份嘅食品嚟，
唔好以為健康就喪啪，
但係點講都無食碗沙嗲牛麵咁多油嘅。
純麥片製作社重點推介嘅係沖繩原味麥片，
聞落有陣陣黑糖味，
食落香口脆身、
有淡淡甜味同燕麥嘅香味，
入面有唔少大大粒嘅杏仁同南瓜籽。
成件事raw得嚟又唔會太寡，
有味得嚟又唔會覺得太重口味。
不過我自己反而鍾意可可味多啲，
因為佢陣可可味唔係低b朱古力味，
一拃食落去係成熟嘅黑朱味，
陣味好似好貴嘅朱古力產品咁。
（內有杏仁）
黑芝麻味行嘅路線同可可味嘅好似，
都係得丁屎咁多甜、
味道唔膚淺、貼近原味嗰種嚟。
不過黑芝麻味呢隻如果溝其他嘢例如奶或者乳酪嚟食嘅話
陣黑芝麻味會畀人冚咗，
好似齋啪先食得出佢乜嘢味咁。
（內無杏仁）
食咗幾日都係撈乳酪食，
大約一半乳酪一半麥片，
裝到好似一碗飯咁多，
計落一包都幾襟食。
我通常同時會飲杯咖啡，
食完嗰下會好撚飽，
然後大約三四個鐘之後肚餓。
食完嗰日或者之後嗰日會屙一篤好健康又暢快嘅屎，
我都想形容畀你聽乜嘢係健康又暢快屎
但係明明呢個post係講嘢食嘅所以我都費事形容得太仔細喇。
因為佢哋人手做又無落防腐劑，
所以食用期唔算好長，
我為咗試味開晒三包，
但係以一日一早餐嘅進度我覺得未必食得晒。
如果你哋買嘅話，
唔好咁重手，
食得晒先至好買，
唔好嘥咗人哋啲心機呀！
一日一早餐 在 【一日一早餐】30日早餐30 days Breakfast Recipes - YouTube 的八卦
... <看更多>